Ahmet Kisa wazeno wa ke her kes bibo vengê ey o ke çin o. Ahmet Kisa goşan û ziwanê xo ra astengkerde yo û seba dadîya xo Elîf Kisa ya 70 serre dest pê kampanyayêk kerd ke dadîya ci bêra veradayene
Ahmet Kisayî seba veradayîşê dadîya xo medyaya komelkîye de kampanyaya ‘edalet û wîjdanî’ daye destpêkerdene. Ahmetî waşt ke wa her kes paştî bido ci.
Elîf Kisa seba ke endama Rêxistina HDPyî ya Elbîstanî bîye 3ê kanûne de mêrdeyê xo reyde ameye tepiştene. Her çiqas mêrdeyê ci Alî Kisa îtîrazan ser o 6ê kanûne de amebi veradayene zî Elîf Kisa hema zî tepişte ya. Elîf Kisa ya 70 serre ya ke Zîndanê Elbîstanî de yena tepiştena dadîya di domanan ê astengkerdeyan a. Lajê ey Îsmaîlo 44 serre bi giranî astengkerde yo û roja ker dadîya ci ameye tepiştene ra nata hetê psîkolojî ra rewşa ci baş nîya. Lajê Elîf Kisa yo bîn Ahmet zî keno ke medyaya komelkîye ser o vengê xo yo ke çîn o bido eşnawitene. Ahmet seba ke dadîya ci bêra veradayene dêsanê keyeyî se ro dowîan daliqneno, kombîyayîşê çapemenîye keno. Nê xîretê Ahmet Kayayî tesîrê meclîsî kerd. La Elîf Kaya nêameye veradayene.
Ahmet seba naye medyaya komelkîye ser o kampanyaya ‘edalet û wîjdanî’ daye destpêkerdene. Ahmetî derheqê kampanya de sey eşkerayîyêke mektubêk nuşt û Ajansê Mezopotamya rê erşawit.
Eşkerayîya Ahmet Kayayî wina ya:
“Ganê ercayeyî!
Dadîya mi 20 rojan ra nata zîndan de ya. Ez wazena ke dadîya mi û ê tepişteyê nêweşî û extyarî pêro bêrê veradayene. Ez edalet wazena. Dadîya mi çîyêko qedexe nêkerd. Aye waşt ke haştîye biba, ciwanî nêmirê.
Dadîya mi ya ke zulmê ‘şahîdê nimitkeyî’ dî hema zî tepişte ya. Ez seba dadîya xo medyaya komelkîye ser o ‘kampanyaya WÎJDAN Û EDALETÎ dana destpêkerdene. Ez venga her kesî, partîyanê sîyasîyan dana ke vera nê zulmî vajê ney. Ez pêro cinîyan û wekîlanê cinîyan ra, ciwananê biwîjdanan ra û pêro babîyan ra paştdayîş wazena. Nê vengî bieşnawê.
23ê kanûne de roja dişemeyî de saete 20.00 de rîpelanê xo yê facebook û twitterî ser o ez do kampanya bida destpêkerdene. Bieşnawê, bidê eşnawitene û paştî bidê.”
