Tecrîdo giran ê serê Rayberê Şarê Kurdî Abdullah Ocalanî dewam keno. Hetê bînî ra hemleya ”Ocalanî rê azadîye meseleya kurdan rê çareserîya sîyasîye’ ya ke 10ê teşrîna verêne de ameye destperdene her hetî ra yena wayîrvejîyayene.
Endama Şaredarîya Napolî ya Îtalya û Akademisyena Unîversîteya Palermoyî Eleonora de Majo derheqê tecrîdê Îmraliyî û paradîgmaya Abdullah Ocalanî de ANFyî rê qisey kerd.
Eleonora de Majo vera tecrîdê giranî yê serê Abdullah Ocalanî nêrazîbîyayîş mojna û nê vatî: ”Şertê zîndanî yê Ocalanî teberê merdimîye yê û antîdemokratîk ê. Coka ma pêro paştî danê kampanyaya mîyanneteweyîye ya ke semedê azadîya Abdullah Ocalanî yena rayraberdene. Ganî ma Abdullah Ocalanî têna sey Rayberê şarê kurdî nê sey erjêkê pîlî yê merdimîye bivînê. Fîkrê Ocalanî her cayê dinya de rayîrê têgêrayîşanê komelkîyan akenê. Mesela têgêrayîşê femînîst, ekolojîk, demokratîkî paradîgmaya Ocalanî esas genê. Bitaybetî semedê jenerasyonanê neweyan muhîm o ke fîkrê Ocalanî yê ekolojîkî bêrê averberdene. Ma kenê ke nê fîkran bajaranê xo de bîyarê caardene.”
Akademîsyene De Majo ard ziwan ke aye derheqê paradîgmaya konfederalîzmê demokratîkî ya Abdullah Ocalanî de xebatê akademîkî rayra berdî û wîna dewam kerd: ”Çîyê ke ma kerdî û kenê bi nînan ma wazenê modelê konfederalîzmê demokratîkî sere de Ewropa her ca de sey nimûne bêro girewtene. Ma kenê heme dezgeh û sazîyanê xo de nê bîyarê caardene. Ez nê modelî sey modelêkê komelkî xebityena. Ganî paradîmayê Abdullah Ocalanî her ca de vila bibê. Fîkrê Ocalanî bitaybetî semedê neslê ameyoxî muhîm ê. Coka ganî paragîmayê Ocalanî mekteban de sey derse bêrê dayene. Beno ke meridmî derheqê Ocalanî de wayîrê zanayîş bê la çîyo muhîm oyo ke fîkrê ey bîdîyê zanayene. Semedê ameyoxî ganî paradîgmaya konfederallîzmê demokratîkî ya Ocalanî ciwanan rê bêro musanayene.” BRUKSEL
