Vervatoxê Partîya Çep a Keske Îbrahîm Akino ke Îzmîr de xebatanê weçînitişî rayra beno ANFyî rê qisey kerd.
Akinî vîst vîrî ke coşêko sey wextê weçînitişê 7ê hazîrane est o û vat: “Partîya Çep a Keske raya verêne kewna weçînitişî. Rixmê nê, 45 panc rojan de ma paştdayîşo gird girewt. Wina wextê kilmî de ma wina zaf yenê naskerdene. Ma pîya bi Îtîfaqê Kede û Azadîye kewnê weçînitişî. Kurdîstan de zî eynî wextî de namzedê Îtîfaqê Azadîye û Demokrasîyî yê. Ma her hetê Tirkîya ra bawerîyan û nasnameyan temsîl kenê. Îtîfaqê ma rayîrê hîrêyinî yê Tirkîya yo ke do demokrasî, azadîye û haştîye înşa bikero. No çîyo zaf erjîyaye yo.
15ê gulane do bibo destpêkerdişêko newe yê seserre. Ma do xirabîye ra bixelisîye û semedê holîye gamêke bierzê. Xora her çî cade nişka nêbedilyeno. Ma wazenê bibê temsîlkarê bedilnayîşî. Ma xebiteyenê ke wa partîya ma meclîs de zaf hêzdar bo. Ma rayanê xo danê Partîya Çep a Keske û seba ke ma rejîmê yewmerdimî ra bixelisîyê, raya binê danê Kiliçdarogluyî. Seba ke ma Erdoganî bişawê, no muhîm o. Raya ke dîyena Partîya Çep a Keske do ameyoxê azad û demokratîkî yê Tirkîya bewlî bikero. Ma veng danê e wa heme şarê ma raya xo bido Partîya Çep a Keske.” ÎZMÎR
