Gerîlayê HPG’ê Egîd Îpek di 23’yê gulana sala 2017’an de şerekê li Girê Xelasor a Dêrsimê de jiyana xwe ji dest da. Serdozgeriya Komarê ya Dêrsimê jî cenazeyê Îpek bi rêya PTT’ê ji malbata wî re şand. Têkildarî mijarê hevseroka Partiya Heremên Demokratîk (DBP) û Parlamentera Amedê Salîha Aydenîz ji MA’yê bi Ayşe Surme û Fahrettîn Kiliç re axivî.
Saliha Aydenîz diyar kir ku nêzîkatiya dewletê ya li dijî cenaze û goristanan hiqûqa dijminatiyê ye û wiha got: “Kevneşopiya dewleta Tirkiyeyê ya sed salan a li dijî kurdan hêj didome. Xwe li ser yekperestî, netewperestî û nijadperestiyê li ser lingan dihêlin. Têkoşîna gelê kurd a çil salên dawî, tevî bedelên giran jî veguheriye têkoşîneke civakî. Ji 7 salî heta 70 salÎ gelê kurd li dora vê têkoşînê kom bû. Dewleta tirk çareseriyê di êrîşkirina nirx, cenaze û goristanan de dît. Bi van rêbazên derhiqûqî, bêwijdanî û bêexlaq re gelê kurd ji nirxên wan dûr bixin. Ji bo wan zarok, jin, pîr, mirî yan jî goristan ferq nake û êrîş dikin. Di her şert û mercan de li gorî hiqûqa dijminatiyê tevdigerin.”
‘Polîtîkaya dijminatiyê qet neguherî’
Aydenîz anî ziman ku di sedsalên komarê de gelek hikûmet guherîne û wiha domand: “Lê dijminatiya li dijî kurdan û polîtîkaya tekperest qet neguherî. Vê dijminatiyê xwe bi tune hesibandin, şewitandin, hilweşandin, pişaftin û bi koçberiya bi zorê xwe da jiyîn. Bi taybetî tifaka AKP-MHP’ê a faşîst hiqûqa dijminatiyê di asta herî jor de û bi rêbazên cuda pêk tînin. Parlamenterê AKP’ê got; ‘Şandina cenaze ya bi PTT’ê guncav e.’ Ev jî polîtîkaya dewletê ya li dijî gelê kurd şênbertir dike.”
Herî dawî jî Aydenîz ev tişt destnîşan kir: “Li dijî gelê kurd bêrûmetî, neheqî û bêwijdaniyê dikin. Lê tevî vê jî kurdan tu carî dev ji doza xwe ya rewa berneda. Di her şert û mercan de jî dê vê doza xwe bidomîne.” AMED
