Şaredarê Hewagê Suphî Aksoy yê AKP’î tabelaya bazara semtê ku bi nivîsên kurdî û tirkî bû, rakir. Aksoy di tabelaya nû de tenê cih da zimanê tirkî
Êrîşa AKP’ê ya li dijî zimanê kurdî berdewam dike. Şaredarên AKP’î piştî ku li bakurê Kurdistanê çend şaredarî bi dest xistin, dest bi êrîşa li dijî zimanê kurdî kirin. Di vê çarçoveyê de şaredariyên AKP’ê yên Bedlîs û Tetwanê tabelayên kurdî daxistibûn û li şûna wan jî tabelayên bi zimanê tirkî daliqandibûn.
Di heman çarçoveyê de şaredarê Hewag a Rihayê yê AKP’î Sûphî Aksoy, nivîsa bi kurdî ya li ser tabelaya bazara semtê rakir. Partiya Herêmên Demokratîk (DBP) piştî ku şaredariya Hewagê qezenc kir, tabelaya bazara semtê ya bi zimanên kurdî û tirkî daliqandibû. Dema ku qeyûm hatiye tayînkirin jî, weke karê destpêkê tabelaya bazara semtê hate rakirin.
Şaredarê nû Suphî Aksoy jî weke karê destpêkê, tabelaya bi zimanê kurdî rakir û ya bi zimanê tirkî lê daliqand.
Hêjayî bibîrxistinê ye ku serokê giştî yê AKP’ê Tayyîp Erdogan di bernameyekê de got; ‘Kurdan hemû mafên xwe bidestxistin.’ Her wiha namzetê serokatiya şaredariyê yê Şaredariya Bajarê Mezin a Stenbolê Bînalî Yildirim jî îro di bernameyekê de wiha got: “Em ê bêhtir piştgiriyê bidin zimanê kurdî.” RIHA
