Hunermendê dêrsimijî Mîkaîl Aslanî hesabanê xo yê medyaya komelkîye ser o da zanayene ke albumê Vengê Royî yo diyîn do nêzdî de bivejîyo.
Albumê Vengê Royî-2 hetê 10 hunermendan ra ame amadekerdene û tede 10 hebî deyîrê kirmanckî (zazakî) estê ke hetê Kadîr Buyukkayayî ra nusîyayî. Mîkaîl Aslanî eşkera kerd ke qeydê albumî safî bîyî û amadekarîya albumî 3 serrî verê cû dest pêkerdbi. Album hetê aranjor Hakan Akayî ra ame qeydkerdene.
Hunermendê ke album de ca gênê nê yê: Besere Şahîn, Rojda, Gulsevene Medar, Sasa, Hani Mojtahedy, Tara Memedova, Mîkaîl Aslan, Mehmet Akbaş, Kerem Sevînç, Xêro Abbas.
Albumê Vengê Royî reya verêne serra 2015î de vejîyabi.
