A
Aldar Xelîl bi peyamekê ragihand ku dewleta tirk li Serêkaniyê çekên qedexekirî yên fosfor û napalmê bi kar tîne û ji bo pêşîlêgirtina qirkirinekê bang li raya giştî ya cîhanê kir
Endamê Desteya Rêveber a Tevgera Civaka Demokratîk (TEV-DEM) Aldar Xelîl têkildarî êrîşa dewleta tirk a li dijî Serêkaniyê li ser hesabê xwe ya twîtterê peyamek parve kir. Xelîl da zanîn ku Erdogan tevî bikaranîna çekên giran û balafirên şer jî di şerê Serêkaniyê de têk çû û niha jî bi rêya bi karanîna çekên qedexekirî dixwaze encam bigire.
Aldar Xelîl bang li tevahiya sazî û aliyên hiqûqî, mirovî û raya giştî ya cîhanî û tevahiya civakên demokratîk kir û ev tişt anî ziman: “Erdogan dixwaze li Serêkaniyê komkujiyê bike. Li Serêkaniyê sivîl hene û niha bi qirkirinekê re rû bi rû ne. Bijîşkan di raporên birîndaran de diyar kirin ku Tirkiye çekên fosfor û napalmê bi kar tîne. Ev çek jî qedexe ne.
Artêşa tirk a dagirker îro li hemberî şervan û şêniyên Serêkaniyê yên ku dixwazin welatê xwe biparêzin, dest bi karanîna çekên qedexekirî kir. Dixwazin wan li wir qir bikin. Komên çeteyan ên girêdayî dewleta tirk li naverasta meydanan sivîlan înfaz dikin. Yek ji mînaka van jî înfazkirina sekretera giştî ya Partiya Sûriyeyê ya Pêşerojê Hevrîn Xelef e. Ev jî sûcên şer in.”
