Endam û rayîrberê Komeleya 78an û parlamenterê HDPyî Alî Çîçeko ke Zîndanê Amedî de netîceyê rojeyê mergî de cuya xo vindî kerdbî, vîrardî
Komeleya 78an ya Amedî û parlamenterê Partîya Demokratîke ya Şaran (HDP) Alî Çîçeko ke 14ê Temmuza 1982î de hemverê zilm û îşkenceyê Zîndanê Amedî de kewtbî rojeyê mergî û cuya xo vindî kerdbî, mezele ci ser de vîr ardî. Vîrardişî de Parlamenterê HDPyî Mûsa Farisogullari, Remziye Tosûn, Salîha Aydenîz û rayîrberê HDP û DPByî hadre bî. Serekê Komeya 78an Ganî Alkan mezelê Çîçekî ser de qisey kerd û va: “Alî Çîçek embazê ma yê hemra bî. Mîraso ke xo dima vera da, ewro Zîndanê Amedî de resayo bi hezaran kesan. Ewro bi serkêşîya Leyla Guvene no 7 aşmî yo ke grevê vêşanîye dewam keno. Wa talebê hepsî û kesê ke grevê vêşanîye de yî bêrî caardene.”
Dima ra Farisogullarî qisey kerd û va: “Alî Çîçek û embazê ê seba bîyayîşê şar û ameyoxê şar xoverdayîşêko gird dayî. Xoverdayîşê înan ewro zî dewam keno. Zîndananê Tirkîye de bi hezaran kes grevê vêşanîye de yî. Wezîrê Edaletî 2 rojî verê eşkerayî da, la çîyê ke ame vatene pratîk de nêame caardene. Rayberê Şarê Kurd Abdullah Ocalan nêeşkeno avûkatanê xo reyde pêvînayîş bikero. Ez veng dana heme selahîyetdaran. Peynîya bêhuqûqîyan bîyarêne. Wa dewlete wezîfeyê xo caabîyara.” AMED
