Paralamenterê HDPyî yê Dêrsimî Alîcan Onluyî paştî daye qerarê Meclîsê Şaredarîya Dêrsimî yê bediLnayîşê nameyî û vat ke êyê ke Dêrsimî çîn hesibnenê hêriş kenê
Paralamenterê Partîya Demokratîke ya Şaran (HDP) yê Dêrsimî Alîcan Onluyî derheqê qerarê Meclîsê Şaredarîya Dêrsimî yê bedilnayîşê tabelaya şaredarîye de eşkerayîyêka nuştekîye daye.
Onluyî bale ant reaksîyonanê ke vera qerarê endamanê Meclîsê Şaredarîya Dêrsimî yê ke hetê şarî ra ameyî weçînayene ser û va: “Bi waştişê şarê Dêrsimî no qerar ameyo girewtene. Seba ke no qerar girewto endamê meclîsî wa weş û war bê. Nê caardişê winayênê ke qirkerdişê Dêrsimî û asîmîlasyonî teşîr kenê û vernîya têrîameyîşî akenê ganî dewam bikerê. Êyê ke vera nameyê Dêrsimî vejîyenê, dejê ke şarê Dêrsimî antî nêvînayîşî ra yenê û Dêrsimî çîn hesibnenê. Senî ke dewlete 1938 de cinî, doman, pîr nêva heme şarê Dêrsimî qetil kerd. Ewro zî heman zîhnîyet hêrişê ziwan, kultur, îtîqat û şaredarîya Dêrsimî keno. Tûncelî nameyo hempar ê heme dejanê şarê Dêrsimî yo. Coka şarê Dêrsimî nê nameyî nêwazeno. Gerarê nameyê Dêrsimî yê şaredarîye ca de yo ma zî paştî danê nê qerarî.” DÊRSIM
