Alîcan Onluyî derheqê Pirdê Ana Fatma Walî Tûncay Sonelî yê wareyê Zîyara Ana Fatma de va: “Çîyo ke qeyûmî kerdo; şaristan de nameyê înan ê ke kulturê ci dir eleqedarîya înan çina ameyo dayene, no yeno manaya çinêhesibnayîşê kulturê ma.”
Tarîxê 29ê Adare de akerdişê Pirdê Ana Fatma Walî Tûncay Sonelî yo ke dekewtişê dewa Babaocagi ya pabesteya merkezê Dêrsimî de yo ame kerdene. No pirdo ke wareyê Zîyara Ana Fatma de ame viraştene rê nameyê qeyûmî walî Tûncay Sonelî panîya, no zî bi sebebê reaksîyonan. Sazîyanê Elewîyan, partîyanê sîyasîyan ê Dêrsimî û organîzasyonanê cimatê sivîlî yê Dêrsimî pirdî ser o kombîyayîşêkê çapemenîye viraşt û reaksîyon da.
Îradeyê sîyasîyî yê şarî xesp kerdibi
Parlamenterê Partîya Demokratîke ya Şaran (HDP) yê Dêrsimî Alîcan Onluyî namekerdişê pirdî rê reaksîyon da û vat ke ganî nameyê zihnîyetê Mûawîyeyî tu cayêkê Hardê Dewrêşî rê nêro panayene û va: “No hal çîyo ke AKP wazeno bi destê walîyî Dêrsim de bica bîyaro îfade keno. Walî Şaredarîya Dêrsimî rê sey qeyûm amebi tayînkerdene. Îradeyê sîyasîyî yê şarî xesp kerdibi. Amacê înan o yo ke ziwan, kultur, bawerî û nasnameyê tarîxî yê Dêrsimî asîmîle bikerê. Înan şaristan açarna qereqolî û bi sembolanê înkarkerdoxan kerd pirr.”
Nîşanêkê polîtîkaya înkarkerdoxe yo
Onluyî dewam de nê va: “Pirdo ke Ana Fatma de ameyo viraştene nîşanêkê polîtîkaya înkarkerdoxe yo; înan şaristan de nameyê kesanê ke kulturê şaristanî dir eleqedarîya înan çina panayî. Înan wextê qirkerdişî de pirdî û qereqolî sey sembolêk şuxulnayî. Bi serran şima do rayîran xira bikerê, dewan bivêşnê bikerê tal û nika zî bêrê pirdêk virazê. No pird pirdê ruşwetî yo. Cayo ke ameyo viraştene zî tesadufî nêyo. No zihnîyet zihnîyetêko xespkar û asîmîlsayonkar o. Ma nê nameyî qetîyen qebûl nêkenê.” Onluyî da zanayene ke ê do derheqê na babete de persêkê vernîyaznameyî bidê TBMMyî. DÊRAZOR 
