Fermandaranê YJA-Starî ra Ferîde Alkan bi wesîleya serrgêra Hemleya 15ê Tebaxa 1984î ANFyî rê qisey kerd û têkoşînê PKKyî yê 50 serran ercna.
Qiseykerdişê Alkane ra tay noqtayê girîngî wina yê:
”Seke zanîyeno PKKyî ra verê cû zî şarê ma çend reyî vera Osmanîyan, dewleta tirke û hişmendîya faşîste sere wedaritbî. Bi taybetî tarîxê Komara Tirkîya de serewedaritişê sey Koçgirî, Dêrsimî ûsn. û reyna Başûr û Rojhelatê Kurdîstanî de zî serewedaritişî qewimîyabi. La seba ke nê serewedaritişan de serkêşîye, yewîye û xoverdayîşo toyekûn çin bîyî ser nêkewtî. Şarê ma bi serran zulm û qirkerdişêko pîl dî.
Bi serewedaritişê PKKyî şarê ma resa Rayberîye zî. 200 serrî erdê Kurdîstanî de vera îşxalkera şerê şarî yeno kerdene. La nê 50 serranê peyênan de serkêşîya Rayber Apoyî de şerê şarî yo rêxistinkerde û plankerde yeno kerdene. Wexto ke PKK ronîya şarê ma bi hawayêkê pîlî paştî da ci. Cuntaya 12ê Êlule ra dima partîya ma 1984 de şerê gerîlayan da destpêkerdene. No şer newe ra ganîbîyayîşî temsîl keno û çêrî, fedakarî û qerardarî îfade keno. Artêşa vera gerîlayan nê şerî de vera xo aver berd û axir artêşa cinîyan zî ronîyaye. PKKyî 1990 de hînî xo resnabi partîya şarî û şerê şarî yo şorişgêr kerdêne.
90an de dewleta tirke bi destekê NATOyî hêrişê ma kerdêne. NATOyî û dewleta tirke pîya JÎTEM na ro ke verê şerê şarî yê şorişgêrî bigêrê. Ê çaxan de JÎTEM, Hîzbulkontra, qoricî, kontragerîla û MÎTî pîya şarê ma rê zulm kerd. La şarê ma reyna zî paştî daye partîya ma û gerîlayan. Dewlete bi nê hêzanê xo dewî kerdî veng, daristanî vêşnayî, şarê ma qetil kerd, cenazayanê gerîlayan rê tecawuz kerd, îşkence kerd. Kurdîstan ame kerdene cehenem. La nê kerdişan ra dima şarê ma hîna zaf destek da PKKyî û vat ‘PKK şar o.’ Ne hêzanê dewlete ne zî şertanê OHALî qerardarîya şarê ma vurnaye. Şar ma tim bi hêzê destekî.
Axir 2010 de prosesê têkoşînê stratejîkî yê 4. de ‘Şerê Şarî yo Şorişgêr’ dîya destpêkerdene. No şer bi taybetî prosesê Şorişê Rojawanî de aver şi. Dima şerê vera DAIŞî zî bingeyê Şerê Şarî yê Şorişgêrî de ame kerdene. Vakur de zî xoverdayîşê xoîdarekerdişî bingeyê ney de ameyî kerdene.
Ewro dişmen pê polîtîkayanê şerê taybetî keno ke cinî û ciwanan rê tesîr bikero û înan têkoşînî ra dûrî bivisno. Ganî cinî û ciwanî verê nînan hişyar bibê. Gerîlayî hê xo ver danê. La ganî gerîlayan reyde cinî û ciwanî zî şaristanan de xo ver bidê, şer bikerê.
Gerîlayî 40 serrî yo vera artêşa tirke ya ke NATO paştî dano ci, bêmabên şer kenê. 40 serrî yo gerîlayî artêşa tirke tim bin visnenê. Destekê NATO û PDKyî ra nêbîyêne gerîlayan rew ra artêşa tirke çin kerdêne. Hetê bînî ra artêşa tirke ya faşîste teyna koyan de û teyna vera ma şer nêkena. Na artêşa faşîste her ca de vera şarê ma zî şer kena. O çax ganî ma bi şerê şarî yê şorişgêrî bi hawayêkê topyekûnî cewabê ci bidê. Ganî her kes bibo ferdêkê nê şerî.
Şer teyna koyan de nêbeno. Êyê ke şerwan ê, kamca de benê wa bibê vera îşxalkeran şer kenê. Çew pêro bare wa milê gerîlayan de meverdo. Wa çew nêvajo ‘Ê herinda mi de mi pawenê.’ Estbîyayîşê kurdan hê binê tehlukeyê qirkerdişî de yê û ancax bi şerê şarî yê şorişgêrî kurdî eşkenê estbîyayîşê xo bipawê. Bingeyê şerê şarî yê şorişgêrî de, hetê gerîlayan de, serkêşîya Rayber Apoyî de ma eşkenê azadîya xo û welatê xo bivisnê destî.
Ez 15ê Tebaxe Roşanê Gandarbîyayîşî fîraz kena, Rayberîye rê hûrmetê xo pêşkêş kena û şexsê Fermandar Mahsûm Korkmazî de pêro şehîdan bi rêzî yad kena. Serkewtiş do bibo ê şarê ma ke bingeyê Şerê Şarî yê Şorişgêrî de têgêreno.” BEHDÎNAN
