Newroze 21ê adare de Amed de do bêra fîrazkerdene. Seba şayîye amadekarîyî dewam kenê. Xebat û amadekarîyê Newroze hetê Komelê Demokratîkî yê Kurdan ra yenê kerdene. Hemserekê Partîya Herêmê Demokratîkî (DBP)yê Amedî Hayrettîn Altunî derheqê Newroza Amedî ya 2022î de ANFyî rê qisey kerd.
Altunî pare kerd ke dewleta tirke 2015î ra nata seba ke destkewteyê înan çin bikerê bi giranî hêrişê kurdan kena la kurdî vera nê hêrişan xoverdayîşî ra apey gamêke nêerzenê. Altunî vat: ”Newroza emserîne do seba xoverdayîş û serkewtişî bibo. Ma zî seba ney xebatanê xo rê dewam kenê. Ma kuçe bi kuçe gêrenê û venga şarî danê ke wa tewrê Newroze bibo. Kurdî hînî vurîyayîşî wazenê û waştişanê xo bi Newroze tacîdar bikerê. Dewlete zî eleqeyê şarî yê bi Newroze vînena.”
Altunî ard ziwan ke dewleta tirke seba ke kurdî nefes megêrê her çî kena û vat: ”Tam nê prosesî de Newroza 2022î do biba roja serewedaritiş, serkewtiş, şiknayîşê tecrîdî û qedînayîşê tedaya vera zîndanan. Hayîya şarê ma bi polîtîkayanê gemarinan esta. Coka şarê ma do Newroze de waştişanê xo bîyaro ziwan.” AMED
