Serdozgerîya Komare ya Amedî derheqê Komeleya Cinîyan a Rosa de tehqîqatêk dabi destpêkerdene û çarçewa tehqîqatî 22ê gulane de 18 kesî ameybî destbendkerdene. Êyê ke ameybî destbendkerdene bado ke rojêke nezaret de mendî vejîyayayî mehkeme.
Sereka Komeleya Cinîyan a Rosa Adalet Kaya, endama ronayoxe Narîn Gezgor û îdarekara komele Fatma Gultekîn, aktivîstê TJA Gulcîhan Şîmşek, hemserekê Pêroyî yo verên ê Partîya Herêmê Demokratîkî (DBP) Mehmet Arslan, endama Heyetê Rayberdişî yê HDPyî Ozleme Gunduz, hemsereka Partîya Demokratîke ya Şaran (HDP) ya Yenîşehîrî Remzîye Sizici, endamê Meclîsê Şaredarîya Rezanî Gonule Aslan û Veysî Coşkun, endama Meclîsê Şaredarîya Bajarê Pîlî yê Amedî Sevîme Coşkun, endamê HDPyî Mehmet Alî Altinkaynak, siyasetmedar û Celal Yoldaş rîyê şahîdê/a nimiteyî/e ra bi îdîaya ”endamîya rêxistene” ameyî tepiştene.
Aktivîsta Tevgerê Cinîyanê Azadan (TJA) Zelale Bîlgîn, endama Komeleya Cinîyan a Rosa Ayla Akat Ata, Endama Meclîsê Şaredarîya Yenîşehîrî Nevrîye Çur û Nazîre Tursun pê şertê kontrolê edlîyî û endama Meclîsê Mayanê Haştîye yê Amedî Havva Kiran bi şertê ”hepsê keyeyî” ameyî veradayene. AMED
