Hemserekê Sendîkaya Kedkaranê Xizmetan ê Komelkîyan û Weşîye (SES) yê Amedî Şîyar Guldîkenî ke MA rê qisey kerd, ard ziwan ke bajar de hendê 20 hezar kesan rîyê vîrusê Korona ra binê karantîna de yê.
Guldîkenî vat: ”Amed de roje de 10-15 kedî rîyê Korona ra dinyaya xo bedilnenê. Ge- ge rojêke de eynî nêweşxane de 15 kesî mirênî. Tay nêweşê ke testê înan nêgatîf ê mirênî la sebebê megê înan sey Korona nîno qeydekerdene. Hewteyo ravêrte de Nêweşxaneyê Perwerde û Cigêrayîşî yê Gazî Yaşargîlî 15 kesanê ke tedawîya Kovîd-19î dîyêne cuya xo vînî kerde la têna sebebê mergê 4 kesan sey Kovîd-19î ame qeydekerdene. Ê bînan de sey KOAH, zaturê û nêweşîyê kronîkî ame nuştene.
Amed de nika 20 hezar kesî keyeyan de binê karantîna de yê. Xora heme Kovîd-19 nîyê. Nînan ra tayî seba ke keye de nêweşî estê, ê zî pîya bi înan karantîna de yê. Heta nika Amed e kesê ke pê nê janî kewtî hûmara înan 100yî ravêrte. Wezîrîya Weşîye vano Amed de rewşa sey xo ya la tîya her roje hûmare zêdîyena. Rojêke de testê 601 kesan pozîtîf vejîyayî. Bitaybetî zî badê veyve û tehzîyeyan hûmarê şina dîyare. Hûmara nêweşanê xebatkaranê weşîye zî sey 500 yena zanayene la raştîye de zafêr a.
Wezîrîya Weşîye hûmara raşte nêdana. Tay nêweşxaneyê taybetî zanayîşê testê PCRyî ke pozîtîf vejîyenê qeyde nêkenê. Eşkerayo ke înan ra wina ameyo vatene. Amerîka de test pozîtîf nêbo zî kam ke bi şikdarîya Kovîd-19î mirêno sey mergê Kovîd-19î nusenê la tîya mergê rîyê Kovîd-19î ra qewimîyenê zî sey nêweşîyanê bînan yenê qeydekerdene û dima ra vanê ma de rewşe hol a. Seba ke nêeşkayî zaf binimnê rojanê peyînan de hûmara biney berde dîyare.” AMED
