Grevê vêşanîye yê tepişteyan ê vera tecrîdkerdişê Rayberê Şarê Kurdî Abdullah Ocalanî 3 mengî peyê xo de verdayî. Seba ke bale bêra antene çalakîya grevê vêşanîye ser her hewte Parka Koşuyolî ya qezaya Rezanî ya Amedî de eşkerayîye yena dayene. Çalakîye na hewte zî rayberîya Kongreya Îslamî ya Demokratîke (DÎK) de do biameyêne kerdene. Endamanê Partîya Demokratîke ya Şaran (HDP), Partîya Herêmê Demokratîkî (DBP) û Têgêrayîşê Cinîyanê Azadan (TJA) zî paştî daye çalakîye. Wekîla HDPyî ya Amedî Remzîye Tosun tewra çalakîye bîye.
Eşkerayîye ra verî polîsanê tirkan pê wesayîtanê zirxînan û TOMAyan dormeyê Parka Koşuyoluyî girewt. Kesê ke seba eşkerayîye ameyî parke mîyanê ablûqaya polîsan de mendî. Astengkerdişî ra dima girseyê şarî pê di koman war de dest pê çalakîya roniştişî ya nêm saete kerd.
Çalakîye ra dima girse vila bi. AMED
