Hemwelatijê ke reaksîyon nîşanê wezîfe ra girewtişê Hemşaredarê Amedî Adnan Selçuk Mizrakliyî danî, vera heme mudaxeleyanê şîdetin yê polîsan de çalakîya xo domnenî. Çalakîyan de tay hemwelatijî xo erd ser de derg kerdî û hewl dayî ke bi no hawa TOMAyan bidî vindetene
Amed de şaro ke seba protestokerdişê xespkerdişê Şaredarîyanê Bajarê Girdî ya Amed, Wan û Mêrdînî yê HDPyî, şî verê şaredarîye raştê hêrişê polîsan ame. Hemwelatijê ke verê awanîya Şaredarîya Bajarê Girdî ya Amedî Raşteyê Xarpêtî de arê bîyî, raştê mudaxeleya polîsan ameyî. Polîsan bi jop û aaa tazîqin mudaxeleya hemwelatijan kerdî. Nê gaman de Endamê Baroya Amedî Avûkat Serhan Ozdemîrî mudaxeleya polîsan bi çepikan şermizar kerd. Wexto ke polîsan hewl da Ozdemîrî bitepişî, serekê verên yê Baroya Amedî Ahmet Ozmenî reaksîyon nîşanê polîsan da.
Çalakîyê ke pêroyê roje de Raşteyê Lîseyî de dewam kerdî de mudaxeleyan vera hemwelatijî birîndar bîyî. 4 TOMAyan pîya awa tazîqin reşênayî hemwelatijan ser û çalakgerî birîndar bîyî. Çalakgerî bi silagana vengê xo berz kerdî û reaksîyonê xonîşan dayî.
Sewbîna mudaxeleya polîsan de xeylê camê dikanan şikîyayî. Parlamenterê HDPyî yê Amedî Musa Farisogullari û Saliha Aydenîze zî Raşteyê Lîseyî de raştê mudaxeleyê polîsan ameyî. Herişê parlementeran ra dima tay hemwelatijî vernîya TOMAyan girewtî û tay zî xo erd ser de derg kerdî ke vernîya TOMAyan bigîrî û têgêrayîşê înan asteng bikerî.
Hemwelatijî Raşteyê Lîseyî ra şîyî awanîya HDPyî ya bajar. AMED
