Taxa Gundogana qezaya Yenîşehîrî de Herdem Ertokuşa 63 serrî îdia kerd ke xebatkarê DÎSKÎyî dayo piro. Ame dîyarkerdiş ke dimayê derbkerdişî Herdem Ertokûşe serê hişê xo ra şîya, bi ambulanse aye wedaritê nêweşxaneyî.
Herdem Ertokuşe dîyar kerd ke aye xebatkarî waşto ke wa saeta înan ya awe ra biewno û vat: “Mi ci ra waşt saeta ma ya awe ra biewno. Seba ke 3 aşmî yo fatûreyê ma yê awe nîno. Mi vat, eke saeta ma ya awe xira bîya, ez şêrî DÎSKÎyî. Vernê de nengî çînayî, dima ra bi kulm û pehnan dayî mi ro. Seba derbkerdişî ez kewta erd. Mi waşt wurzî serê xo la ez nêeşkaya. Hema zî milê mi û goşê mi dejenê.”
Lajê Herdeme, Mehmet Ertokuşî zî ard ziwan ke xebatkarê DÎSKÎyî yê bi nameyê Umîtî dayika ci ra vato, “Ez seba saeta awe ameya, çira ti keye de nîya?” Û dayîka ci derb kerda.
Mehmet Ertokuş waşt hêrîşkar bêro cezakerdiş. AMED
