Amede de bi eşkerayîyêk 150 kesan dest bi nobete kerde. Parlameterê HDPyî Murat Sarisaçî tecrîd sey leteyêkê polîtîkaya qirkerdişî yê vera Kurdan name kerd û vat ke ma pawitoxê dewaya bianore yê, coka vera zextan de çok nêdanê
Grevê vêşanîye yê Leyla Guvene kewtê roja xo ya 129ine. Reyna zîndanan û merkezanê sey Hewlêr, Strasboûrg, Toronto û Amed de bi tewrbîyayîşê hezaran kesan grevê vêşanîye yê bêdem-bêagêrayîşî yenê domanyene.
Parlamentera HDPyî yê Amedî Dersîm Dage û endamê partîye Salîh Cansever, Îsmet Yildiz, Sevîcan Yaşar, Salîh Tekîn û Bîlal Ozgezer 3yê Adare de, parlamenterê HDPyî yê Wanî Tayyîp Temel û Murat Sarisaçi û endamê partîye Abdulhalîk Kurt û Yusuf Ateş zî 8ê Adare de dest bi grevê vêşanîye kerdbî. 3ê Adere ra polîsan hîre rey eşt banê HDPyî ser. Netîceyê hêrişan de 4 çalakwanî ameyî destbendkerdene, 3ê înan hema binê nezaretî de yê. Ewro Îdarakarê HDP, DBP û ESPyî, temsîlkarê Sazgehanê Cimatê Sivîlan, Mayê Aşitîye, hemşaredarê ke ameyî îxraçkerdene û merdimê Xoverdayoxanê Zîndanan ra 150 kesan ra grûbêk seba paştdayîşî dest bi çalakîya nobete kerde. Derheqê babete de banê HDPyî yo ke tede çalakîya parlamentan yena domnayene, eşkerayîyêk ameye dayene.
Eşkerayîye de parlameterê HDPyî Murat Sarisaçî bi wesîleya serrgêra Qirkerdişê Halebçe qirkerdiş şermezar kerd, şehîdî yad kerdî û wina va: Polîtîkaya qirkerdişê şarê Kurdî roja ma de dewam kena. Bi Qirkerdişê Halebçe ame waştene ke şarê Kurdî bêro çînkerdene. Bi hezaran bedelî ameyî dayene. Peynîya 31 serran de ma dî ke şar nêqêdîya, rejîmê faşîstî qêdîyayî. Ewro 5 hezar embazê vera tecrîdê serê Birêz Ocalanî grevê vêşanîye de yê. Na hamleya qirkerdişî zî sey heme hêrişanê vera Kurdan do pûç bêrê vetene. Ma hole zana ke ewro wazenê ke şarêk çîn bikerê.Şexsê Birêz Ocalanî de hêrişê şarê Kurdî kenî. La ê se kenê wa bikerê ma pawitoxê dewaya bianore yê, coka vera zextan çok nêdanê. Ma venga şarê xo danê, ganî ma destûr medo zîndanan ra meyîtê embazanê ma bivejîyê.Coka ganî şar vengê xo hîna berz bikero û xoverdayîş bêro xurtkerdene. Ma reyna tîya ra xoverdayişo bianer yê Leyla Guvene silam kenê û vanê ke waştişê Guvenê û Xoverdayoxanê Zîndanan waştişê ma yê. AMED
