Amadekarîya Newroza Amedî ke her serre bi heybetin yena pîrozkerdene temam bîye. Yeno pawitene ke çalakîyê grevê vêşanîye mohrê xo bidî pîrzkerdişanê Newroze. Do mesajê Hemsereka KCDyî Leyla Guvena ke 133 rojî yo grevê vêşanîye de ya bêro wendene
Newroza Amedî ke her serre bi heybetin yena pîrozkerdene. Emserr zî Newroza Amedî bi siloganê ‘Ma do tesilî ser bikewî û tecrîdî bişiknî’ do bêra viraştene. Newroza Amedî cayê her serrî Raşteyê Newroze (Newroz Park) yê qezaya Rezanî de do bêra pîrozkerdene. Yeno pawitene ke bi sehezaran kesî tewrê Newroze bibî. Amadekarîyê Raşteyê Newroze zî peynî bîyî. Endamê Komîteya Amadekar ya Newroze û namzedê HDPyî yê hemşaredarîye keye bi keye, kuçe bi kuçe gêrenî û şar dawetê Newroze kenî.
Xeylê kes do tewrê Newroze bibo
Hemsereka Pêroyî ya Partîya Demokratîke ya Şaran (HDP) Pervîn Buldan, Hemserekê Kongreya Komela Demokratîke (KCD) Berdan Ozturk, Hemserekê Pêroyî yê Partîya Herêmê Demokratîkî (DBP) Mehemt Arslan, Hemverfekê Kongreya Demokratîke ya Şaran (HDK) Sedat Şenoglu, Tevgerê Cinîyanê Azadan (TJA), parlamenter û namzedê hemşaredarîye yê HDPyî, Partîyê Kurd yê mîyanê îtîfaqê weçînitişî de ca gênî, Hemsereka SYKPyî Canan Yuce, Wekîlê Serekê Pêroyî yê ESPyî ŞahînTumuklu, Hemserekê Pêroyî yê ÎHDyî Eren Keskîn û Ozturk Turkdogan, Hemserekê Pêroyî yê KESKyî Mehmet Bozgeyîk, Sereka Pêroyî ya EMEPî Selma Gurkan, temsîlkarê DÎSKî, rayîrberê MED-DERî, temsîlkarê komelkî yê sivîlî û Wezîrê Dewlete yê verên Ziya Halîsî do tewrê Newroze bibî.
Keyeyê kesê ke cuya xo vindî kerdî dawet bîyî
Keyeyê Kemal Kurkut, keyeyê Medenî Yildirim, keyeyê Mehmet Tunç, keyeyê Mehmet Yavuzel, keyeyê Taybet Înan, keyeyê Sêvê Demîr, Pakîze Nayir û Fatma Uyar, keyeyê Ethem Sarisuluk û Berkîn Elvane zî dawetê pîrozkerdişê Newroze ameyî kerdene û yeno pawitene ke tewrê Newroze bibî.
Heyetê Fransî ame tepiştene
Rayîrberê Partîya Komunîst ya Fransayê Sylvie Jan û Michel Laurentî vizêr seba tewrbîyayîşê Newroza Amedî Teyaregehê Ataturkî ya Stenbolî de teyare ra ameye war û ewja de ameye tepiştene. Jan û Laurentî goreyê xala 9. ya hûmara qanûnê 6458î ke teberê sînorî bikerên yenî vindetene.
Mesajê Leyla Guvene do bêro wendene
Pervîn Buldan, Berdan Ozturk, Mehmet Arslan, temsîlkarê partîyê kurd û aktîvîsta TJAye Ayşe Gokkane do Newroze de qisey bikerî. Yeno pawitene ke mesajê Hemsereka KCDyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî 133 rojî yo grevê vêşanîye de ya bêro wendene.
Bi seyan rojnamegerî do Newroze taqîp bikerî
Bi seyan rojnamegerî do Newroze taqîp bikerî. Seba taqîpkerdişê Newroza Amedî xeylê rojnamegerê xerîbî ameyî Amed. Heta nika nizdîyê 300 rojnamegerî mîyanê welat û teberê welatî ra seba akredîtasyonî muracatê HDPyî kerdî.
Hunermend Bajar, Koma Pel û Pinar Aydinlare zî do Newroze de konser bidî. AMED
