Çatrayîrê Yenî Halî yê qezaya Kayapinarî yê Amedî de vizêr şan qezayêkê trafîkî de 2 kesî merdî û 8 kesî zî bi giranî birîndar bîyî.
Qeza serê rayîrê Amed-Riha de qewimîya. Wesayîtêk gina refujeyê mîyanênî û dîrekanê ceyranî ro û derbazê şerîdê bînî bi. Wesayît dima ke gina di wesayîtanê bînan ro vindert. Tesîrê qezayî ra merdimî wesayîtî ra perayî teber. Birîndarî pê ambulansan wedarîyayî nêweşxaneyan. Nînan ra di kesî rixmê pêro mudaxeleyan merdî. 8 birîndarê bînî hema zî binê tedawî de yê.
Dêrsim de qezayê trafîkî
Dêrsim de zî vizêr nêmroje wesayîtêkî rayîrê Esnaf û Sanatkaran de gina dadîya Meleke Ataç û kênaya ci Oyku ro. Oykuya ke rewşa ci giran a sewqê Nêweşxaneyê Şaristanî yê Xarpêtî ameye kerdene. Bedenê dadîye de zî tay cayê şikiteyî estê. Ramitoxê wesayîtî M.D. îfade da û derheqê qezayî de tehqîqat dîya destpêkerdene. AMED
