Amedijê ke vera xespkerdişê îradeyî kuçeyan de yê ard ziwan ke ê semedê wayîrvejîyayîşê raye, anor û destkeweteyanê xo xoverdayîş de yê
Vera xespkerdişê şaredarîyanê Amed, Wan û Mêrdînî yê Partîya Demokratîke ya Şaran (HDP) yê ke hetê rejîmê AKP-MHPyî ra ameyî destsernayene bi rojan o xoverdayîşê şarê kurdî dewam keno. Bitaybetî zî Amed de her roje saete 11.00î de Kuçeyê Lîse de çalakîya roniştişî virazenê. Amedijê ke vera xespkerdişê îradeyê xo kuçeyan de yê ANFyî rê qisey kerdî.
Şarê Amedî nêterseno
Arîfe Kardeşe bale ante xoverdayîşê şarî ser û va: “Ma rayê xo dayî Selçûk Mizrakliyî û ma o vîjna. Cok ra şaredarê ma o yo. Qeyûm heta eşkeno wa ûca ronişo, heme şarê Amedî Mizrakliyî sey serekê şaredarîye vîneno. Înan eşkera îradeyê ma xesp kerd. Ma rayê xo înan nêdayî, coka ma heqê xo zî helal nêkenê û heta peynî dimayê rayanê xo de yê. Çalakîyê ma do her roje dewam bikerê. Bi hêrişan wazenê ma bitersnê la şarê Amedî nêterseno. Xora bi serran o ma nê zext û îşkenceyanê înan vînenê. Ma çi rey verê zextan de milê xo çewt nêkerd, ma do ewro ra tepîya zî çewt nêkeno. Şar do kuçeyan de wayîrê îradeyê xo bivejîyo.”
Rayê ma şerefê ma yê
Îsmaîl Uzmezî nê va: “Heta ke serekê şaredarîyan ê ke ma vîjnayî meagêrê karê xo ser do çalakîyê ma dewam bikerê. Ma do rixme heme hêrişan îrade û rayanê xo rê wayîr vejîyê. Rayê ma şeref û namûsê ma yê. Ma rayê ke bi îradeyê xo şuxulnayî rê wayîr vejîyenê. Heta ke qeyûmî şorê ma do xoverdayîş rê dewam bikerê.”
Ma qeyûmî nas nêkenê
Şehmus Çikar zî bale ant polîtîkaya hêrişkare ya AKPyî ser û qiseykerdişê xo de wina va: “Xespkerdişê îradeyî zulm o û ma nê zulmî qebûl nêkenê. Cok ra ma her roje kuçeyan de yê. Ma qeyûmî nas nêkenê. Ma bi rayanê xo Selçuk Mizrakli kerd serek û serekê şaredarîya ma o yo. Çîyo ke ewro ma rê bîyo, beno ke siba şarê tirkî rê bibo. Ganî vera na neheqîye her kes vengê xo berz bikero.”
Şarê ma ganî wayîrê destkewteyanê xo bivejîyo
Safîye Akdage zî wina ercna: “Xora bi serran o heqê kurdan yenê binpaykerdene û kurdî çîn hesibyenî. Nika zî bi qeyûman îradeyê şarî yeno îşxalkerdene. Bi rojan o ma kuçeyan de xover danê. Verê çimanê dinya de ma raştê hêrişanê girdan yenê. La ê se kenê wa bikerê ma do verê zextê înan de çok nêdê. Ma xover da danê û ma do xoverdayîş rê dewam bikerê. Wa heme şarê ma wirzo lingan ser û wayîr îrade û destkewteyanê xo bivejîyo.” AMED
