9ê Teşrîna Verêna ya 1998î de hemverê Rayberê PKKyî Abdullah Ocalanî de komployêk mîyanneteweyî dest pêkerd û 15ê Sibata 1999î de teslîmê Tirkîya ame kerdiş. Rayberê PKKyî a roje ra nata Îmraliyî de binê tecîrdêk giran de yeno tepiştiş. 35 aşmî yo ke tu xeberêke ci ra nîna girewtiş. Her ke tecrîdê serê Abdullah Ocalanî giran bî, Rojhelatê Mîyanênî de şer zî gur bî û Kurdistan de polîtîkayê asîmîlasyonî û qirkerdişî xorî bî.
Ver bi serrgêra komployê mîyanneteweyî ra pêroyê Ewropa de kampanyaya ‘Abdullah Ocalanî rê azadî, problemê kurdî rê çareserîya sîyasî” dîya destpêkerdiş û kampanya her cayê dinya de bi eleqeyêk gird yena rayîr ra berdiş. Xeylê welatan de felsefeya Abdullah Ocalanî yeno munaqaşakerdiş.
Aktîvîste Anna Bruna Camposampiero ya ke falîyetê sendîkalî rayîr ra bena û lingê kampanyaye ya Îtalyayê de ca gêna, derheqê babete de JINNEWSî rê ercnayîş kerd.
Pêkerdiş semedê tecrîdî ameyo awankerdiş
Annaye da zanayîş ke xeylê sebebê tecrîdî ke bi serran o dewam kenê, est ê û vat ke yew ê tewr esas NATO yo û wina vat: “Tirkîya hemkarîya NATOye ya. Tena hetê cografyaye de nê hetê îdeolojîk de zî wina ya û nizdîyê Ewropaye ya zî. Xêrcê sebebê bînan, Stenbol de bi raydayîşê Parlenmentoya Ewropaye serra 2010î de bî Paytextê Çinitişî yê Yewîya Ewropa. Hemwelatijê Ewropa sey welatê bîn yê Yewîna Ewropa bê vîze yenê Tirkîya. Kişta nînan de sewbîna xeylê pêkerdişê şenik û gird zî est ê. Coka ra ez vana; Qey vengê kurdan û Ocalanî hetê Ewropaye ra nîno eşnawitiş. Sebebê înan mi cor de rêz kerd.”
‘Ganî Îtalya vengê xo berz bikera’
Annaye dîyar kerd ke prosesê komployê mîyanneteweyî de Îtalya 1ê Teşrîna Verêna ya 1999î de heqê starbîyayîşê sîyasî da Abdullah Ocalanî û vat ke esasê nê qerarî de ganî Îtalya vera tecrîd û şertê tepiştişê Ocalanî de vengê xo berz bikero û welatê ke ewil ganî vengê xo berz bikero yo. Annaye na babete de wina ard ziwan: “Heqê starbîyayîşî ke Îtalya seba Rayber Apoyî tesdîq kerdo est o. Wexto ke nê verê çiman de bêro girewtiş, ganî welatê mi vengê xo berz bikero. Ganî Abdullah Ocalan bi lezkî serbest bêro verdayîş. Seba nê hemeyan ganî ma bi lezkî bêvengîye bişiknê.”
‘Dimayê sibate her roje şer est o’
Annaye dewamê qiseykerdişê xo de nê çîyan vat: “Komployê Sibate ra heta nika şerê Rojhelatê Mîyanênî her ke şino giran beno. Serra 2000î ra heta nika rewşa Rojhelatê Mîyanênî xirab bena û seba herême bêra bêîtîbarkerdiş şer yewbînan taqîp keno. Seba ke herême bikerê binê kontrole xo, her tim şer yeno rayîr ra berdiş. La lazimî bi vengê ke qala aştîye kenê est o. Şerê ke yeno rayîr ra berdiş her ca de vila bîyo. Amancê DYAye no yo ke herême bê îtîbar bikera û bikera binê kontrolê xo. Rewşe kontrolî ra vejîyaya û rîsk est o ke pêrodayîş hîna hîra bibo.”
‘Lazimî bi têgêrayîşê gird est o’
Annaye qiseykerdişê xo yê peyênan de derheqê falîyetê kampanyaye û qewimîyayîşê peynî de ercnayîş kerd û vat: “Lazimî bi têgêrayîşêk gird û xurt est o. Ma Îtalya de bi hawayêkê hemwext kombîyayîş pê ard. Ez Mîlano de ciwîyena. Dezgehêk ke tede sendîka, komele û şexsîyet ca gênê, ame awankerdiş. Lazimî est o ke no veng ewro bi selahîyetdaran bêro eşnawitiş. Lazimî bi serbest verdayîşê Abdullah Ocalanî est o. Ganî ma teda bi heme kesî bikerî ke serbestverdayîşê Abdullah Ocalanî pê bêro. Lazimî bi têgêrayîşêk gird est o.” ANQARA
