Kuçeyê Derya yê taxa Îsmetpaşayî yê qezaya Elmadagî yê Anqara de vera keyeyêkê kurdî hêrişêko nîjadperest ame kerdene. Perey şewe saete 10.30 de cîrananê Z.D. (38) ê ke geverij a, ci rê vato ‘kurdê pîsî’, ‘terorîstî’ û xîret kerd ke hêrişê înan bikerê. Z.D. vat: ”Ez û 5 domanê mi 2 serrî yo ma tîya de xebitîyenê. Çend hewte yo ê pê ma heqaretan kenê. Semedo ke ez apartmanî ra şêra înan îmzayî arê dayî.”
Z.D.ya ke mêrdeyî ra cîya bîya û 5 domananê xo reyde manena, ard ziwan ke lajê ci keyeyan de pakîye keno û 15 rojî yo ê gêrenê keyeyêkî. Z.D. vat: ”Vizêr înan domananê mi het de vat ‘Ma kurdan nêwazenê.’ û xîret kerd ke hêrişê ma bikerê. Heqaretan ra dima ma gerreyê polîsan kerd. Înan hetê polîsan de zî xîret kerd ke hêrişê ma bikerê. Wexto ke polîsan ê tepiştêne înan ra yew hêrişê ma kerd. Lajê mi tersî ra kard girewt xo dest. Dima polîsan lajê mi rê gef wend û vat ‘Ma tîya de yê la to kard girewt xo dest. Ma eşkayêne to bikişê.’ ”
Keyeyî hêrişî ra dima keyeyê xo hewilna Hasanoglanî.
20ê temmuze de zî qezaya Altindagî ya Anqara de vera keyeyêkê kurdî hêrişo nîjadperest ame kerdene û hêriş de 4 kesî birîndar bîyî. 21ê temmuze de Konya de zî Hakîm Dal amebi kiştene. ANQARA
