Komeleya Rojnamegeran a Dîcle û Firatê (DFG) dê sibê di salvegera 28’emîn a qetilkirina zanayê kurd Mûsa Anter (Apê Mûsa) ku di 20’ê Îlona 1992’yan de ji aliyê JÎTEM’ê ve hat kuştin, li du navendan bernameyên bîranînê lidar bixe.
Ji bo bîranîna Anter bernameya destpêkê dê li Semta Seyrantepe ya Amedê li cihê lê hatiye qetilkirin bê lidarxistin. Bername wê saet di 11.00’an de bê lidarxistin û parlamenterên HDP’ê, rêveberê Kongreya Civaka Demokratîk (KCD), nûnerên rêxistinên sivîl, nûnerên rêxistinên rojnamegeran û rojnameger tev li bîranînê bibin.
Piştî bernameya li Amedê, dê saet di 15.00’an de li ser gora Anter a li gundê Sitîlîlê ya navçeya Nisêbînê ya Mêrdînê jî bernameyeke bîranînê bê lidarxistin.
Her wiha ji bo dayîna xelatên rojnamegerên di pêşbirka ku her sal li ser navê Mûsa Anter tê lidarxistin de xelat girtine jî li Stenbolê saet di 17.00’an de merasîmek bê lidarxistin. AMED
