15 hepsîyê grûba yewin yê PKK û PAJKî ke seba qedînayîşê tecrîdê serê Rayberê PKKyî Abdullah Ocalanî 30ê Nîsane de dest bi rojeyê mergî ra yewe zî Ardil Çeşme ya. Çeşme va: “Ez kurd, şorişger, demokrat û ekolojîst a. Ez nêeşkaya vera îşkenceyî de bêveng bimana. Ez wazena Rayberê xo reyde bicuya. Şima kamî ca de cuyenî? Seba heqê cuye şima zî piştî bidêne ma. Wa kesê meraq nêkero. Ma do ser bikewî.”
Qezaya Licê ya Amedî rixmê heme şidet û hedefgirewtişanê dewleta Tirkî ya îşxalkare de, çi rey game pey de nêeşta. Licê ê cayan ra cayêk o ke xo mîyan ra xeylî qehreman û şorişgêrî vetê û kerdê pîl. Nê qehremanan ra yewe zî Ardil Çeşmeya ke 1ê Adare ra nata seba şikitişê tecrîdê giranî yê serê Rayberê Şarê Kurdî Abdullah Ocalanî grevê vêşanîye yê bêdem û bêagêrayîşî de bîye, 30ê Adare ra nata zî çalakîya xo açarnaye rojeyê mergî.
Çeşme ya ke serra 1973 de qezaya Licê ya Amedî de amî dinya, domana 6. ya keyeyêkê 8 domanan bîye. Keyeyê înan dimayê erdlerzê serra 1975î koçê merkezê Amedî kerd. Çeşme serra 1980 de dest bi perwerde kerd, perwerdeyê xo Amed de qedîna. Çeşmeya ke tim hetê dormeyê xo ra bi coş û rîyê xo yê huyayeyî ameyêne naskerdene, hewna emrê xo yê qijkekî de derheqê hemrayîye de nûşteyî nûştêne.
Çeşme serra 1994 de, merkezê Amedî de bi hemrayêka xo dir amî tepiştene û dima ra hetê mehkema ra aye rê cezaya muebbetî ame dayene. Sere de Amed sirgûnê Çewlîg, Mûş û xeylî zîndananê bînan amî kerdene, tewr peynî sirgûnê Zîndanê Tîpa Myî yê Gebze ame kerdene. Çeşme mektubêke erşawite û mektuba xo ya ke 6ê Gulane de nuşta de wina vana:
“Ez 20 rojî yo ke rojeyê mergî de ya. Ez baş a. Rojanê verênan de kewtişê tansîyonî vera dejê serê mi zêde bî. Bedenê mi musayoxê tewirê awe bî. Awa sol, şekir û saf… Mi xo musna ke merdim senî xo musneno tay rewşan. Ez sey awe ya, weselam. Ez Licê de ameya dinya û badê erdlerzê Licê ma şîyî Amed. Ma welatê xo de sey girewteyan cuyenî. Ma herra xo ra qut nêbîyî. Ma verika Zagrosan de pîl bîyî. Zagrosan ma pîl kerd. Kesê ke bi ma bawer nêkenî wa biewnî çimeyanê arkeolojîk. Zanist zî ispat keno, la dewlete înkar kena. Gelo merdim eşkeno xo înkar bikero? Nê merdim nêeşkeno. Ez rindî, germî, qeder, huyê domanan û berrê bawerîyan ser de pîl bîya.”
Her çiqas ke ez tirk nêba zî her serê sibayî sund ameyêne wendene. Mi nêwendayêne. Çimkî ez tirk nîya. Serranê 80an serranê domanîya mi bî. Mi şorişgerî, şoriş, binpaykerdiş, ters, îxanetkar û lehengî şinasna. Ez 1993î de tewrê têkoşînî bîya û 20ê teşrîna peyêne ya 1994î de ameya tepiştene. Aşmêk binê çiman de raştê îşkence û atcîzî ameya. 45 serrî ya. 25 serrî yo ke zîndan de ya. Hetêk pîl yê cuya mi zîndan de derbaz bî. Teber nîno vîrê mi. Waya mi Nejla (Jiyan) 1999î de wexto ke gerîla tepîya ancîya kemînêk de şehîd kewte. Wextê şehadetê aye de ez zîndan de bîya. Mi mergê xeylê embazanê xo yê zîndanan dî. Pîyê mi cuya xo vindî kerd û xeyalê vejîyayîşê mi kerdêne. La nêbî. Seba ke ma herra xo ser de azad bicuyî, no 25 serrî yo ke ez zîndan de ya. Ez çîyo ke aîdê xo wazena. Sebebê grevê mi no yo.
Ez Ardil Çeşme! Seba şerê no welatî peynî bibo, ez kewta rojeyê mergî. Ez kurd, şorişger, demokrat û ekolojîst a. Ez nêeşkaya vera îşkenceyî de bêveng bimana. Ez wazena Rayberê xo reyde bicuya. Şima kamî ca de cuyenî? Seba heqê cuye şima zî piştî bidêne ma. Wa kesê meraq nêkero. Ma do ser bikewî. Mi vera mergî de dest bi rojeyê mergî kerde.” STENBOL
