Li bajarê Minbicê ya bakur û rojhilatê Sûriyeyê xebatên çand û hunerê bi hemû hêza xwe didomin. Ji van saziyên ku xebata çand û hunerê dimeşîne Navenda Çand û Hunera kantona Minbicê ye. Navenda Çand û Hunerê bi riya vekirina dewreyên hunerî û çandî gelek derfetan ji ciwanan re ava dike û dihêle ku ciwan kêrhatiyên xwe yê hunerî derxînin holê. Navend di gelek beşên weke şano, wênexêzî, mûzîk û hwd xebatan dide meşandin û perwerdeyên taybet tê dayîn.
Lava Xelîl ya 13 salî perwerdeya Kemanê dibîne hestên xwe wiha derbirî: “Ev nêzî 6 mehan ez li alava Kemanê didim. Min pir jê hez dikir û îro roj bûye kêrhatiya xwe derxînim pêş û di kemanê de jêhatî me. Navenda Çand û Hunerê ya kantona Minbicê ev derfet ji me re da ku em kêrhatiyên xwe pêş bixin. Em çênd jinên ciwan li ser gelek alavan mîna Keman, Gîtar, Bizq û Ûd de xwe perwerde dikin. Ez hîna di asta navîn de me û ji bo baştir li Kemanê bidim xwe perwerde dikim . Ez dixwazim di demên pêş de li ser dikên mîhrîcan û şahiyan li Kemanê bidim.”
Lava Xelîl li ser xebatên xwe ev tişt anî ziman: “Di demên berê de me tu jinên ciwan alaveke mûzîkê li kolanê rakiriye nedîtibû lê bi vekirina dewreyên mûzîkê re her kesê dixwaze kêrhatiya xwe pêş bixe, berê xwe dide navenda çand û hunerê. Ev gav jî li kantona Minbicê hunerê pêş dixe.”
Endama Navenda Çand û Hunerê Fatma Zehraa El-Xelîl a 18 salî got ku dewreyên mûzîkê ne tenê ji bo alavek tê dîtin û destnîşan kir ku li ser gelek alavan perwerde dibînin û wiha pê de çû: “Çi kesê kêrhatiya wan hebe dikare berê xwe bide navenda çand û hunerê ji bo xwe pêş bixe. Ji ber armanca me ya sereke ji van dewreyan ew e ku em piştgiriya kêrhatiyên ciwanan li kantona Minbicê bikin. Dewreyên me yên folklorî, wênexêzî ji bo hemû temanan re vekiriye. Gelek jinên ciwan û xort hene pêwîstî heye kêrhatiyên wan derkevin holê, em jî hewil didin vê yekê bikin.”
Sîdra El-Elî ya 16 salî ku di folklorê cihê digire hestên xwe wiha anî ziman: “Piştî min dît jinên ciwan ên di temenê min de di komên folklorê de cih digirin û min biryar da ez jî beşdarî perwerdeyê bibim. Ez gelekî ji folklora ku dîroka me temsîl dike hez dikim. Em bi destpêşxeriyên navenda çand û hunerê gelekî kêfxweş im. Çi kesê kêrhatiya wan hebe bila ji biçûkaniya xwe ve pêş bixin ji ber derfet her dem tune ne.”
