Hevserokê DBP’ê Mehmet Arslan anî ziman ku tevî hemû zextan, gelê kurd di hilbijartinê de xwedî li vîna xwe derketiye. Arslan diyar kir ku gelê kurd di vê hilbijartinê de peyamên girîng dane wan û dê ev pêvajo ji bo wan bibe pêvajoya rexnedayînê
Hevserokê Partiya Herêmên Demokratîk (DBP) Mehmet Arslan têkildarî encamên hilbijartina rêveberiyên herêmî û polîtîkayên AKP’ê ji Ajansa Mezopotamyayê (MA) pirsên Mehmet Şah Oruç û Ozgur Paksoy bersivand. Arslan da zanîn ku tevî îktîdara AKP’ê bi zext û hîleyan pêvajoya hilbijartinê meşand jî nekarî biserkeve.
Mehmet Arslan da zanîn ku hêza şer têk çû û bi vê hilbijartinê hat dîtin ku polîtîkayên tundî, zext û şer êdî li ser civakê nikare hukmê bike. Arslan wiha domand: “Hilbijêran nîşan da ku li dijî polîtîkayên tundî û şer in ji daxwaz û vîna xwe gavan paşve navêjin. Mînaka herî girîng jî Kurdistan bû. Li Stenbol, Enqere, Edene, Mêrsîn û Antalyayê ku ji navendên herî girîng ên aborî, turîzm, sanayî û nifûsê yên Tirkiyeyê ne, AKP’ê winda kir. Ya ku bi AKP’ê daye windakirin, polîtîkayên wê yên şer e. AKP û Erdogan bi gel re ketin rikberiyê û winda kirin.”
Hejmara leşker û polîsan rêjeya nifûsê guherand
Arslan destnîşan kir ku HDP’ê piraniya şaredariyên ku qeyûm lê hatine tayînkirin paşve girtine û wiha got: “Ev serkeftinek girîng e. Agirî, Bedlîs û Şirnex jî bi hîleyan ji destê HDP’ê girtin. Li herêmê tevî qeymeqam, walî, leşker û polîsan xebitîn. Bi taybet jî li herêma Botanê beriya hilbijartinê hêjmarekê zêde ya polîs û leşkeran qeyd kirin. Vê jî rêjeya nifûsê guhert. Mînak; li Elkê nifûsa navçeyê 5 hezar e. Lê 5 hezar û 500 hilbijêr hene. Ev nîşan dide ku ji derve pir leşker û polîs wekî hilbijêr hatine qeydkirin. Li Qilebanê nifûs pir kêm e. Lê ji derve 2 -3 hezar hilbijêr anîn. Li navenda Şirnexê jî 12 hezar hilbijêr ji derve anîn. Rêjeya AKP’ê ya dengan li Şirnex û herêmê 42 hezar e. Dengê HDP’ê yê li Şirnexê jî 168 hezar in. Ev hemû lîstikên AKP’ê yen li ser şaredariyê nîşan dide. AKP’ê di sala 2016’an de bi qeyûman vîna gel xesp kir, niha jî bi hîle û tundiyê vîna gel xesp dike.”
Pêvajoya rexnedayînê
Di berdewamê de jî Arslan bi lêv kir ku cihê ku HDP’ê lê winda kirine dê yek bi yek binirxînin û ev agahî dan: “Em ê rexenedayîna vê bidin gelê xwe. Em mecbûr in li gorî pêdivî û daxwazên gel polîtîka û xizmetê pêş bixin. Em ê vê pêvajoyê weke pêvajoya rexnedayînê bigirin dest.”
Peyamên gel
Mehmet Arslan got ku divê kurd êdî polîtîkayeke neteweyî ku her çar parçeyan di nava xwe de dihewîne, bimeşînin. Herî dawî jî Arslan bal kişand ser tecrîda li ser Rêberê Gelê Kurd Abdullah Ocalan û wiha dawî li axaftina xwe anî: “Di vê hilbijartinê gel, peyamên girîng dan me û îktîdarê. Gel ne tenê ji bo şaredariyan, her wiha xwest ku li ser hesasiyetên wan jî bê sekinandin. Bi taybet jî xwestin ku em bala cîhanê bidin ser tecrîda li ser Ocalan. Ger di dema xwe de partiya me tecrîd xistibûya rojeva xwe, ji xwe nedigihişt vê astê. Ji bo çareseriyeke li Rojhilata Navîn, divê tecrîdkirina Ocalan bi dawî bibe. Ger ku Tirkiye bixwaze siyaseteke asayî bimeşîne, divê tecrîdê bi dawî bike. Divê AKP zimanê rageşiyê biterikîne û dev ji înada li dijî kurdan berde.” AMED
