Artêşa tirk li Kurdistanê hewl dide hemû tiştên dîrokî ji holê rake. Di vê çarçoveyê de artêşa tirk li Licê 15 şikeftên dîrokî bi teqemeniyan rûxandin
Dewleta tirk li Kurdistanê ne tenê gelê kurd hedef digire, bi rê û rêbazên pir cuda hewl dide her tiştê ku li ser navê kurd û kurdayetiyê û xwezayê jî tune bike. Di vê çarçoveyê de li hêlekê bi rêbazên êrîşên fîzîkî hewl dide civaka kurd bi temamî bi tepisîne, lawaz bike û koçber bike, li hêlekî bi pêşxistina tiryak, fihûş û pişaftinê dixwaze civaka kurd ji xwebûna xwe derxîne, li hêlekî ji Efrînê heta Dêrsim, Amed, Çewlik, Colemêrg û başûrê Kurdistanê agir ber dide daristanên Kurdistanê û dike xwelî, li hêla din jî bi rêya rûxandin û bendavan dîroka li Kurdistanê tune dike.
Di çarçoveya vê polîtîkaya tunekirinê de, artêşa tirk li Licê ya Amedê gelek şikeft bi teqemeniyan rûxandin. Artêşa tirk di 30’ê hezîranê de bi tevlêbûna gelek cendirme û polîsên tîmên taybet, li çolterên taxên Tepe, Siginak, Dallica, Bûdak û Kutlu yên Licê êrîşeke berfireh dabû destpêkirin. Leşkeran li herêma ku êrîş kirinê noqteyên lêgerînê danîbûn.
Artêşa tirk di çarçoveya êrîşê de bi piştgiriya helîkopter û Balafirên Hewayî yên bê Mirov (ÎHA), bi ser malan de girtin û nasnameyên 452 welatiyan di GBT’ê re derbas kirin û 96 wesayît jî kontrol kirin. Artêşa tirk di 2’yê tîrmehê de jî ji herêmê vekişiya.
Têkildarî mijarê walîtiya Amedê daxuyaniyek dabû û diyar kiribû ku di êrîşê de bi gişt3ı 15 şikeftên xwezayî hatine rûxandin. AMED
