Di 27’ê kanûna 2021’an de hêzên leşkerî yên Iraqê hewl da ku derdora Wargeha Penaberan a Şehîd Rustem Cûdî (Mexmûr) têl bikin. Li ser vê yekê gelê wargehê bi awayekê girseyî bertekên xwe nîşan da. Piştî helwesta gel hêzên arteşa Iraqê paşve gav avêtin.
Piştî vê hewldanê, şandeyek ji saziyên wargehê hat avakirin û li gel rayedarên leşkerî yên Iraqê hevdîtin pêkanîn. Heta niha rayedarên hikûmetê tu bersivek erênî nedane. Li dijî vê yekê li ber seytereya ketina wargehê konê çalakiyê hatiye vedan û ev çalakî didome.
Di van rojên dawî de jî artêşa Iraqê li baregeha xwe ya ku dikeve navbera wargehê û navçeya Mexmûrê de hejmarek zêde kuleyên leşkerî amadekiriye.
Lê heta niha nayê zanîn ev kule ji bo dorpêçkirina wargehê anîne vêderê, yan jî ji bo karek cuda anîne.
Gelê wargehê jî ji rewşa heyî bi guman nêz dibin û diyar dikin ku ew ê tu carê qebûl nekin dora wargehê bi têlan û kuleyan were dorpêçkirin. MEXMÛR
