Artêşa tirk talan û wêraniya xwe ya li dijî xwezaya Kurdistanê didomîne. Hêzên dagirker li sêgoşeya navçeyên Licê, Farqîn û Pasûr ên Amedê 19 şikeftên xwezayî bi bombeyan teqandin
Dewleta tirk li bakur, rojava û başûrê Kurdistanê li hêlekê dagirkeriya xwe berfireh dike, li hêlekê qirkirinan pêk tîne û li hêla din jî xwezaya Kurdistanê tune dike. Di vê çarçoveyê de ji Efrînê heta Serêkaniyê, Girê Spî, bajarên bakurê Kurdistanê û herêmên Başûr, li gelek herêman deverên dîrokî tune kirin û xwezaya wan talan kirin.
Artêşa tirk ku di bin navê ‘şerê li dijî PKK’ê’ de Kurdistanê wêran dike, li Amedê jî heman hovîtiyê dike. Di vê çarçoveyê de hêzên artêşa tirk li sêgoşeya navçeyên Licê, Farqîn û Pasûrê yên Amedê bi beşdariya gelek yekîneyên taybet di 23’yê kanûnê de operasyona leşkerî pêk anî. Hat zanîn ku operasyona dagirkerî û wêraniyê duh bi dawî bû.
Li gorî agahiyên ji herêmê, hêzên artêşa tirk li herêmê bi ser gelek malan de girtin lêgerîn pêk anîn. Di heman demê de hat ragihandin ku leşkerên artêşa tirk 19 şikeftên xwezayî jî rûxandin. AMED
