Derket holê ku artêşa tirk ji Çiyayê Bagokê navenda Nisêbînê bombebaran dike û heta niha di encama bombebarana dewleta tirk de gelek sîvîl hatin kuştin. Li herdu aliyên sînor di bombebarana Tirkiyeyê de bi dehan sîvîl hatin kuştin
Dewleta tirk di êrîşên li ser Bakur û Rojhilatê Sûriyeyê de hiqûqa şer binpê dike û sûcê mirovahiyê pêk tîne. Dewleta tirk di êrîşên li ser Qamişlo, Girê Spî û Serêkaniyê de raste rast sîvîlan bombebaran dike û heta niha zarok jî di nav de bi dehan sîvîl hatin qetilkirin.
Artêşa tirk êrîşî Nisêbînê dike
Dewleta tirk di êrîşan de serî li hemû rêbazên qirêj dide û hat ragihandin ku arteşa tirk ji Çiyayê Bagokê êrîşî navenda navçeya Nisêbînê ya Mêrdînê dike. Li gorî daxuyaniyên walîtiya Mêrdînê heta niha li Mêrdînê 8 kes di encama êrîşan de hatine kuştin. Walîtiya Mêrdînê îdia dike ku kesên sîvîl di encama êrîşên şervanên HSD’ê de jiyana xwe ji dest dane. Lê derket holê ku kesên sîvîl di encama bomberana artêşa tirk de hatine kuştin û ji Çiyayê Bagokê raste rast navenda Nisêbînê hedef hatiye girtin.
HSD: Me li Nisêbînê nedaye
Beriya ku agahiya dewleta tirk Nisêbînê bombebaran dike were bi destxistin berdevkê HSD’ê Kîno Gabrîel bi daxuyaniyê ragihand ku şervanên wan êrîşî Nisêbînê nekiriye û dewleta tirk derewan dike. Gabrîel got ku dewleta tirk derewan dike û nûçeyên ku HSD êrîşî sîvîlan dike ne rast in. MÊRDÎN
