Li Serêkaniyê di navbera şervanên HSD’ê û hêzên dagirker ên dewleta tirk û çeteyên wê de şerekî giran heye. Hat zanîn ku dewleta tirk bi hemû hêza xwe û bi çekên qedexekirî êrîşî bajar dike
Di navbera şervanên Hêzên Sûriyeya Demokratîk (HSD) û hêzên artêşa tirk a dagirker û çeteyên wê de li Serêkaniyê, Girê Spî û Kobanê şerekî dijwar heye. Dewleta tirk bi taybet jî ji bo dagirkirina Serêkaniyê hemû hêza xwe bikartîne. Lê tevî vê yekê jî nikare bikeve bajar.
Li gorî agahiyên ji Serêkaniyê, artêşa tirk a dagirker û çeteyên wê di van kêliyan de bi awayeke dijwar û çekên giran êrîşî bajarê Serêkaniyê dike. Hat zanîn ku hêzên dagirker di êrîşên xwe de balafirên şer, tank, obus, fuzeyên katyûşayê û çekên qedexekirî yên fosforê bikartîne.
Çavkaniyên li Serêkaniyê ragihandin ku şerê li derdora bajar derbasî hundir bûye. Hat zanîn ku di pevçûnan de gelek çete û leşkerên dewleta tirk hatine kuştin. Di heman demê de şehîd û birîndarên HSD’ê û yên sivîlan jî hene. Çavkaniyan destnîşan kir ku artêşa tirk a dagirker rêya ku ketine bajar girtine û nahêlin ku bijîşk xwe bigihînin nexweşxaneyan. Erebeyên ambulansê jî dibin hedefa balafirên şer.
Li Kobanê panzêrek û 2 erebeyên doçkabarkirî hatin rûxandin
Di heman demê de şervanên HSD’ê li eniya di navbera navçeyê Çelebî û gundê Ebû Sirayê yênli başûrê rojhilatê Kobanê çalakî pêk anîn. Hat zanîn ku di çalakiya şervanan de panzêrek û du erebeyên doçkabarkirî hatin rûxandin. KOBANÊ
