Arteşa tirk gundên Xelîfan, Çiya Dêl û Sîran ên herêma Bradostê bombebaran kirin. Her wiha hat zanîn ku artêşa tirk şêniyên gundên navborî jî gulebaran dike
Hêzên artêşa tirk îro di danê sibehê de gundê Mêrgereş a girêdayî Geliyê Şêx Zadanî ya Herêma Bradostê bombebaran kir. Di encama bombebaranê de agir bi deşta Hêrt a Bradostê ket. Dema ku pêşmerge ber bi herêmê ve çûn jî artêşa tirk herêm careke din bombebaran kir û di encamê de 3 pêşmerge birîndar bûn.
Hat zanîn ku artêşa tirk vêcarê jî gundên Xelîfan, Çiya Dêl û Sîran ên herêma Bradostê ya Hewlêrê bombebaran kirin. Di heman demê de welatiyên sivîl ên herêmê jî gulebaran kirin.
Li gorî agahiyên ji herêmê, artêşa tirk şêniyên gundên navborî gulebaran kirin. Hat ragihandin ku artêşa tirk li gundan kamerayên çavdêriyê danîne û her kesê ku nêzî çiya dibin an jî pezê xwe dibin çêrandinê, gulebaran dikin. HEWLÊR
