Operasyonê teberê sînorî bi serran o dewam keno. Tevgerê Pençe’ 2 aşmî yo ke dewam keno. Rojnameger Seyît Evran derheqê hêrişê artêşa Tirkî yê bi nameyê Pençe dewam kenî de va ‘merdim vajo nê hêrişê AKP û Erdoganî yî, hîna raşt beno’ û wina dewam kerd: “Ê seba ke derheqê Kurdîtîye de çîyên nêverdî hêriş kenî, labelê seke tena vera PKKyî de şer kenî, wina nîşan danî. Heta nika derbê girdî werdî, labelê înan heta nika misqalêk zî netîce nêgirewto.”
Artêşa Tirkî vera Başûrê Kurdîstanî de bi nameyê Tevgerê Pençe 1, 2 û 3 hêrişî dabî destpêkerdene û nê hêrişî hîna zî dewam kenî. Rojnameger Seyît Evran ke herême de averşîyayîşan nizdî ra taqîb keno, derheqê amanc, merhale û sewbîna yê hêrişan de qisey kerd.
Rojnameger Evranî dîyar kerd ke hêrişî 2 serrî yo dewam kenî, labelê heta nika artêşa Tirkî misqalêk zî netîce nêgirewto. Evranî qiseykerdişê xo wina domna: “Nînan ewil Sûrîye de waşt ke bi rayîrê OSO bibî wayîrê Sûrîye, labelê veng vejîya. Nika proseso ke Idlib de dest pêkerdo û îxtîmal esto ke ê bi temamî Sûrîye ra bêrî vetene. Tirkîya polîtîkaya ‘Wa Kurdî Sûrîye de nêbî wayîrê heqî’ domnena. Heto bîn de vera Başûrî de zî hêrişî dîyayî destpêkerdene. Tirkîya hewl da bi PDKyî Rojawan de ENKSyêk awan kerd, labelê netîce nêgirewt.”
Evranî dewamê qiseykerdişê xo de qala hêrişê ke vera Başûrî de benî kerde û wina va: “Înan hêrişê xo yê 2 serran sey ‘Pençe 1’ û ‘Pençe 2’ name kerdî. Nika zî hêrişê ke vera Heftanînî de kenî bi hawayo ‘Pençe 3’ name kenî. Xora rojanê sifteyînan de derbê giranî werdî. Dewleta Tirkî 2 serrî yo ke hewl dano Bradostî bigîro binê kontrolî, labelê netîce nêgêno. Nika zî hewl dano Heftanîn bigîro. Labelê nê hêrişê neweyî nîyî. Dewleta Tirkî ti netîce nêgêna. Leşkerê înan vera PKKyîyan de bêçare yî.”
Evranî dewamê qiseykerdişê xo de wina va: “Eke merdim vajo nê hêrişî yê AKP û Erdogan î, hîna raşt beno. Çimkî artêşî çîyo ke înan ra yeno vatene, kenî. AKP û Erdogan eşkenî seba amancanê xo artêşe bierzî mîyanê şerî. Xora Sûrîye de wina kenî. Başûr de tay no yeno kerdene. Amancê înan derheqê Kurdîtîye de çîyêk nêmano yo. Wexto ke wina kenî zî, seke tena vera PKKyî de şer kenî, wina nîşan danî. Ê Kurdîstano Federe sey şaşîya xo vînenî û bi hawayo aşkere vanî.”
Evranî qiseykerdişê xo de qala bêvengîya hêzanê herêmîyan kerde û wina domna: “Mesût Barzanîyî vatbi ‘Ez do destûr nêda ke gonîya Kurdan bi destê Kurdan bêra rijnayene’ û no zî nîşan dano ke tayê bedilîyayîşî estî. Labelê tîya de çîyo esas vindetişê şarî yo. Tîya de hêzê bînî ameyî bêvengkerdene. Sey nimune Goran bi hemparê hukmatî û bi no hawa ame bêvengkerdene. Goran de bedilîyayîşî estî. Gorano ke sersefîrê Tirkîya qebul nêkerd, nika vera hêrişan de bêveng o. Mîyanê PDK û YNKyî de reaskîyonê cîddîyî estî. Yê ke vengê xo nêvetî zî, seba ke menfîetê înan esto bêveng î. Nê hêrişan de tesdîqê Amerîka zî esto. Amerîka seba ke paradîgmaya Rayberê Şarê Kurdî Abdullah Ocalanî ver û hem zî seba ke Tirkîya vera Îranî de bikar bîyaro, tesdîq da. Labelê Erdogan zî wexto ke tesdîq girewt, dîyar kerd ke o vera Îranî de nîyo.” AMED
