Asayîşa Germiyanê bi hinceta ‘Bi aşkerayî dewleta tirk tê şermezarkirin’, destûr neda ku gelê Germiyanê li dijî dagirkeriya dewleta tirk dakeve qadan
Bi armanca şermezarkirina êrîşên dagirkeriyê yên dewleta tirk ên li ser başûrê Kurdistanê û şewitandina dexlûdanê gelê herêmê, Eniya Niştimanî ya Germiyanê biryar dabû ku îro saet di 17.00’an de li navçeya Kelar a Germiyanê çalakiyê li dar bixe. Lê asayîşa Germiyanê destûr neda ku gel dakeve qadan.
Têkildarî mijarê endamê Eniya Niştimanî ya Germiyanê Goran Rehîm axivî û wiha got: “Em çûn serdana qeymeqamê Kelarê. Daxwaza me erê kir. Lê Asayîşa Kelarê ji me re got; ‘Agahiya me ji daxuyaniya ku hûn bidin heye û hûn ê bi aşkerayî dijberiya dewleta tirk bikin.’ Me jî jê re got ku çalakiya me li dijî dagirkeriya dewleta tirk û şewitandina dexlûdanê cotyarên herêmê ye.”
Hincetên sosret
Goran Rehîm destnîşan kir ku piştî di daxuyaniya de guhertin çêkirin, careke din çûne Asayîşa Germiyanê û ev agahî dan: “Li wir ji me gotin; ‘Em rê nadin ku ev çalakî pêk were. Ji ber ku rewşa ewlehiya herêmê û di navbera hinek partiyên kurdan de nebaşe. Dibe hinek kes vegerînin şaşiyekê.’ Bi vê yekê re çalakiya me qedexe kirin.” SILÊMANÎ
