Hemserekê Federasyonê Elewî-Bektaşî Mustafa Aslanî ANFyî rê qisey kerd. Aslanî vist vîrî ke Qirkerdişê Madimakî 30 serrî xo pey de verdayî rixmê ney zî faîlan hema zî verê edaletî de hesab nêdayo.
Aslanî bale ante ser ke prosesê dewaya Qirkerdişê Madimakî de dewlete erkê xo nêana ca û vat: ”Nê mehkemeyanê sexteyan de huqûq nêno caardene. Faîlê raştikênî ancax pê têkoşînê ma do bêrê muhakemekerdene. Elewîyî bi qetî hemwelatîya têdûşte wazenê. Dewlete ganî seba Qirkerdişê Sêwasî û ê bînan uzrê xo biwaza, nînan de têrî biba. Ganî Otêka Madimakî biba muzeya şerme, dersa dînî ya mecburîye wa bêra wedaritene, Dîyanet bêro wedaritene, cemxaneyan rê statuyê îbadetxaneyî bêro dayene. Heta ke nê waştişê ma bêrê caardene ma do têkoşîn bikerê.”
Aslanî pare kerd ke kesê çepgîr, sosyalîst û roşnvîrî elewîyan têkoşînê înan de teyna verdêne û organîzasyonê serra 30. de zî înan no çî dîyo. Aslanî vat: ”Kesê ke xo rê vanê muxalîf bi qîmî paştî nêdanê têkoşînê elewîyan ê seba hemwelatîya têdûşte. Partîyê sîyasîyî bi wekîlanê elewîyan anxac destekêkê temsîlîyî danê ma. Ma ê asta tamsîlîye de destek vînenê la pabeyê wayîrvejîyayîşê û destekêkê girseyî yê. Nê welatî de heta ke tirkî meseleya kurdan nîyarê ziwan, sunîyî heqê elewîyan nêwazê mumkîn nîyo ke têkoşînê ma yê azadîye û heqan aver şorê.”
Aslanî pê hesna ke bi wesîleya serra 30. ya Qirkerdişê Madimakî emser hema zaf çalakî û aktîvîteyî do bêrê kerdene. Aslanî venga pêro merdiman da ke bi hawayêkê girseyî tewrê nê çalakî û aktîvîteyan bibê.
