Navenda Nûçeyan
Greva birçîbûnê ya li dijî tecrîdkirina Rêberê Gelê Kurd Abdullah Ocalan di 27’ê Mijdarê de li girtîgehên Tirkiye û bakurê Kurdistanê bi rengê bêdem û bidorveger dest pê kir, mehek li pey xwe hişt. Greva birçîbûnê bi koma 7’an dewam dike.
Şîvekar Ataş ku 2018’an li Girtîgeha Girtî ya Jinan a Sîncanê tev li greva birçîbûnê bûbû, di greva birçîbûnê ya 27’ê Mijdarê de li Girtîgeha Girtî ya Jinan a Bakirkoyê cihê xwe di nava koma 3’emîn de girt.
Ataş bi rêya malbata xwe girtiyên di grevê de ne hemû silav kir. Ataş diyar kir ku wê dest ji greva birçîbûnê bernedin û wiha got: “Ger hûn dixwazin sala 2021’ê em sax bin, wê demê xwedî li greva birçîbûnê derkevin. Bêguman em naxwazin bimirin; lê belê em dixwazin gelê me xwedî li greva birçîbûnê ya ji bo bidawîkirina tecrîdê derkevin. Em ji vê derê silavên xwe ji zindanan hemûyan re dişînin. Heta ku daxwazên me bi cih bên anîn têkoşîna me wê dewam bike.”
