Nazli Çîçek Tute 5 serrî yo ke taxa Ofîsî ya qezaya Yenîşehîrî ya Amedî de atolyeyêk hunerî xebetîyena. Atoleye bîya cayê hunerîhesan û keso/a ke şono/a atolye ewja de huner museno/a. Atolye de xeylê çîyê balkêşî yenê viraştene û kesê ke yenê atolye xo rê sey cayê terapî vînenê. Derheqê babete de Nazli Çîçek Tuta ke atolyeye de xebetîyena û Eylem Esen, Medîha Akyildiz û Merve Akyildiza ke şonê atolye qisey kerdî.
Nazliye destpêkê qiseykerdişê xo de daye zanayene ke aye 5 serrî yo ke atolye de xebetîyena û wina va: “Ez û mêrdeyê xo ma pîya atolye akerd. Ma atolye sere de seba gure akerde û dima ra ma atolye de bedilnayîşan viraşte. Atolye cayêko şexsî ra vejîya teber bîye cayê hunerhesan. Kesê ke wazenê bixebetî yenê tîya. Sewbîna ma seba debare çîyê dekoratîn rote. Atolye seba ma bîye cayêko bi qîymet. Ma tîya de dest bi perwerdeyî zî kerde.”
‘Atolye serê esasê berardişî de ya’
Nazliye dewamê qiseykerdişê xo de bale ante xebatanê ke atolye de yenê kerdese ser o va: “Ma atolye de perwerdeyê heykel, ahşap û maskeyan zî danê. Ma pê çend wendekaran dest bi perwerdeyî kerde. Çiqas şî eleqeyê seba atolye zêde bî. Êdî hîna zêde merdimî yenê atolye. Atolye serê esasê berardişî de ya. Amacê ma tena ekonomî nîyo. Ma wazenê ke kesê ke yenê tîya boya xo bidî û xo baş hîs bikerê.”
‘Ma hemverê vîrusî tedbîr girewto’
Nazlîye dîyar kerd ke wextê pandemî de mabêne dabî xebatanê xo û wina va: “Vernîya pandemî de karê me zaf baş bi la bi pandemî reyde prosesê karantîna ame destpêkerdene. La bi dest pêkerdene prosesê normalbîyayîşî de ma reyna karê xo dewam kerd. Ma atolye de tedbîrê ke lazim kenê girewt û ma xebatanê xo qelebalix nêkenê, bi maske û kom bi kom xebatanê xo kenê.”
‘Berardiş xercê xozaya cinîyan o’
Eylem Esen, atolye de serê texte de nexşê babûne viraznena û wina qalê karê xo kerd: “Ceribnayîşê min ê winasî çinbî. Coka mi waşt ke dest bi kurs bikerî. Sebebê ameyîşê min ê kursî seba waştişê berardişî bi. Xora cinî her wareyê ciwîyayîşî de bi berardişî ser o bîyayîşê xo ramojnena. Berardiş xercê xozaya cinîyan o. Seba ke ez stresê karî serê xo ra bierzî, mi dest bi na xebate kerd.”
‘Bi huner şekil dana cuya xo’
Medîha Akyildiz, tewrê xebatê atolye bena fikrê xo wina ard ziwan: “Ez serê karê rolyef de xebityena. Ez demêk derg o ke resiman viraznena. Mi waşt ke bi xebatê cîya şeklêk bidî cuya xo.”
‘Seba mi sey terapî yo’
Merve Akyildiz zî qiseykerdişê xo de bale ante serê atolye û wina va: “Atolye seba mi sey terapî ya. Ez tîya maskeyan viraznena. Verê zî mi heykel viraştêne. Amed hetê hunerî ra şaristanêk zaf dewlemend o. Ez Manîsa ra ameya la Manîsa sey Amedî hetê hunerî ra hende dewlemend nîya.” AMED
