Endamê Komeleya Huqûqnasan a Seba Azadîye (OHD) avûkat Veysî Eskîyo ke seba veradayîşê Wekîlê TÎPî Can Atalayî verê Edlîyeya Çaglayanî de nobeta edaletî de yo, derheqê babete de ANFyî rê qisey kerd.
Eskîyî pare kerd ke goreyê bira Mehkemeya Qanûnê Bingeyîyî (MQB) avûkat û wekîl Can Atalay ganî bêro veradayene ke weçînayîşanê 14ê gulane de sey wekîlî amebi weçînayene.
Avûkat Eskîyî ard ziwan ke na rewşe 4ê teşrîna peyêne ya 2016î de Selahattîn Demîrtaş û xeylêk sîyasetmedaran ê bînan rê ameya ferzkerdene. Eskîyî vat: ”Seke zanîyeno, o çax bi paştdayîşê CHPyî heqê destpanêdayîşê wekîlîye yê wekîlanê HDPyî wedarîyabî. Bêhuqûqîye hêverî vera kurdan yena ceribnayene, dima vera muxalefetî yena caardene. Ma na nimûneya Enîs Berberogluyî de zî dîye. Berberogluyo ke CHPyî ra bibi wekîl la rixmê biranê MQB û Mehkemeya Heqanê Merdiman a Ewropa (MHME) vera nêdîyabî. Yanî mehkemeyê herêmîyî biranê MQB û MHME bi hawayêkê antîazadîperestî şirove kenê coka mexdûrîyetê nê kesan dewam kenê.”
‘Heyetê Dadger û Dozgeran erkanê xo nêkeno’
Eskîyî vist vîrî ke vera Hemşaredara Amedî ya verêne Gultan Kişanake zî heman bêhuqûqîye yena kerdene û vat: “Rixmo ke heqê dadgeranê ceza çin o ke vera azadîye şirove bikero tim na babete de şiroveyan kenê û biranê winayênan danê. Rewşa Selahattîn Demîrtaş û Fîgen Yuksekdag bi heman hewayî yê. Vera muxalefetî huqûqê dişmenîye yeno kerdene. Bi taybetî hem Dewaya Gezî de hem zî Dewaya Kobanê de huqûqê qesasî yeno ferzkerdene. Heyetê Dadger û Dozgeran erkanê xo nêkeno. Ganî heyet cade derheqê Mehkemeya Cezaya Girane ya 13. de tehqîqat abikero.” STENBOL
