Endama Konseya Hemserekîya Pêroyî ya KCKyî Avesta bi wesîleya serrgêra Komployê Mîyanneteweyî Sozdare Avesta bi wesîleya serrgêra 25ine ya Komployê Mîyanneteweyîyî ANFyî rê qisey kerd.
Qiseykerdişê Sozdare Avesta ra noqtayê girîngî wina yê:
”Ez bi wesîleya serrgêra 25ine ya Komployê Mîyanneteweyîyî xoverdayîşê Îmraliyî yê Rayber Apoyî selam kena. Rayber Apoyî nê 25 serran de het hetî ra ra komplo ercna. Şerê Dinya yo 3. bi Komployê 15ê Sibate dîya destpêkerdene. Komplogeran seba ke herême goreyê waştişanê xo dîzayn bikerê no komplo plan kerd. Çunke înan Rayber Apo û têgêrayîşê azadîye verê xo de sey astengî dîyêne.
Hêzanê komplogeran ê sey Amerîka, Îsraîl, Îngilîstanî çareserîya meseleya kurdan asteng kerde. Nê hêzan komplo kerd. Rayber Apoyî pêro raştîyê komployî dîyî. 25 serrî yo netîceya polîtîkayanê komployî de vera têgêrayîşê ma hêrişî yenê kerdene. Rayber Apo 25 serrî yo Îmrali de yeno esîrkerdene û dewleta tirke cendirmetîya Îmraliyî kena.
Nê 25 serran de serkêşîya cinî û ciwanan de şarê kurdî û dostanê înan vera komployî xoverdayîşêko bêeman kerd. Kurdan destpêkê komployî ra dima her cayê dinya de çalakîyê bitesîrî kerdî. Şarê ma 25 serrî yo seba azadîya Rayberîye waran de yo.
Rayber Apoyî bi xo bi paradîgmaya xo ya azadîye komplo pûç kerd. La komplogerî nêwazenê ke meseleya kurdan çareser bikerê coka her hewayî tecrîdî kenê giranêr. 25 serran de çîyêk nêmend ke komplogeran kerdo la înan netîce girewte. Ê nêresayî hedefê xo komplogerî hema peyê hedefê xo de yê.
Nê prosesî de seba azadîya Rayberîye tepişteyî zîndanan de grevê vêşanîye kenê, dadîyî Nobeta Edaletî kenê, Parisî ra ver bi Strasbourgî Rayraşîyayîşo Derg yeno kerdene, di baskan ra Vakur de Rayraşîyayîşê Azadîye yeno kerdene. Nê pêro mojnenê ke têkoşînê ma azadîya Rayberîye ra ber çîyêkî qebul nêkeno.
Rayber Apo temsîlkarêkê neteweya kurdan o. Coka nêbeno ke o bêro esîrkerdene. Rayber Apo seba pêro merdimatîye xo ver dano. Hînî ma nêzdîyê azadîya ey ê. Coka ganî ma têkoşînê xo aver berê.” BEHDÎNAN
