Endama Konseya Serekîya Pêroyî ya KCKyî Sozdar Avesta bernameyê Xwebûnî ya JIN TVyî de tay ercnayîşî kerdî.
Qiseykerdişê Sozdar Avesta ra noqtayê girîngî wina yê:
”Cinîyêka kurde ya ciwane eke çeke bêra xo destî hinî bena perwera azadîye. Cinîyî bi eşqî tewrê têkoşînê ma yê azadîye benê. Raştîya cinîyan ganî têgêrayîşê azadîye û gerîlayan de bêra ercnayene. Mîyanê têgêrayîşê ma de cinîyî bi nêzdîbîyayîşê Rayber Apoyî, bi nasnameyê gerîlayan pênase benê. Destpêkê têkoşînê azadîye ra nata cinîyî tewrê karanê stratejîkan bîyî. Rayber Apoyî cinîyî tewrê têkoşînî kerdî. Cinîyî bîyî ronayoxê partîya ma.
Cinîyan bi tewrbîyayîşê gerîlayan mîyanê şorişî de şorişêk kerd. Rojhelatê Mîyanênî û Kurdîstan de cinîyî mîyanê çar dêsan de ameybî hepskerdene. Kurdîstan de cinîyan seba ke sîstemê pederşahîye, dewleta camêrdan ra hesab bipersê verê xo da koyan.
Cinîyî 40 serrî yo herikîyenê koyan. Cinîyî teyna seba şerkerdişî ney; seba hesabpersayîşî zî çeke gênê xo destî. Rêxistina ma de wina yew taybetmendîye est a ke cinîyî wayîrê artêşa xo yê. Eke cinîyî bi hawayêkê xoserî xo rêxistin nêkerê, artêşa xo awan nêkerê nêeşkenê mende bibê.
Cinîyî bi asanî tewrê gerîlayan nêbîyî. Destpêk de gerîlayanê camêrdan gerîlayê cinîyî qij dîyêne, peyê cepheyî de verdayêne. La Rayberîye nê şaşîtîyî raşt kerdî. Cinîyan zî xo îsbat kerd. Seba cinîyan ê kurdan PKK û Rayber Apo bîyî şensê pîlî. Mîsal PDKyî û YNKyî sey PKKyî nêkerd. Înan cinîyî keyeyan de verdayî. La PKKyî îradeyê cinîyan şinasnayî.
Xopawitişê cinîyan pawitişê komelî yo. Ma gerîlatîye û artêşbîyayîşê cinîyan teyna sey pawitişêkê fîzîkî nêvînenê. Têkoşînê awankerdişê kesayetê azad û cuya azade yo. Her gandar wayîrê sîstemêkê xopawitişî yo. Mîyanê komelî de tewr zaf cinîyan rê xopawitiş lazim o.
Vera têkoşînê azadîya cinîyan hêrişê îdeolojîkî zêdîyayî. Tayê kesî vanê ‘wextê gerîlatîye nîyo.’ Her roje kontrayî hêrişê cinîyan ê kurdan kenê. Goreyê hişmendîya AKPyî ‘herinda ke cinîyî bibê gerîla wa fuhuş bikerê.’ AKP wina nêzdîyê cinîyan ê kurdan beno.
Rewşêka winayêne de ma nêeşkenê vajê ke wextê xopawitişî qedîyayo. Ganî cinîyê ciwanî tewrê gerîlayan bibê. Ganî ma ercnayîşê Rayber Apoyî ‘Êyê ke ma ra hes kenê wa verê xo bidê koyan’ bikerê esas.”
