Avûkatê Buroyê Huqûqî yê Asrinî Faik Ozgur Erolî ANFyî derheqê tecrîdê serê Rayberê Şarê Kurdî Abdullah Ocalanî de qisey kerd.
Avûkat Erolî ard ziwan ke Tirkîya de huqûq goreyê ‘krîteranê Ocalanî’ yeno caardene û vat: “Serranê 2006-2007 de vera muebetê giranî Mehkemeya Heqanê Merdiman ê Ewropa (MHME) rê muracat ame kerdene. MHME xeylêk muracatî kerdî pêser û 2014 de qerar girewt. Goreyê nê qerarî hepsê heta merdişî sey muameleyê teberê merdimîye ame hesibnayene û Tirkîya ra ame waştene ke wa nê qanûnî bibedilno. La nê qerarê MHME çîyêk nêbedilna. Tena verê tehlîyeyê bêşertî ame akerdene. Nizdê 7-8 serran ame pawetene ke Tirkîya gamêke bierzo la qet gamêke nêameye eştene. Naye sero 2021 de Tirkîya ra grûbêke reyna muracat kerd. Heta nê muracatî MHME têna qerar girewtbi û qet nêşibi Tirkîya ser ke wa qerarî bîyaro ca. Badê nê muracatî Komîteya Wezîran na babete girewtê rojdemê xo û Tirkîya ra cewabêk waşt. Tirkîya pê raporanê ke şawitî têna waşt mesele bido kişt. Nizdîbîyayîşê Tirkîya eynî wextî de eşkera nizdîbîyayîşê vera Abdullah Ocalanî ramojeno. Tirkîya 22 serrî yo xeylêk qerarê qanûnî goreyê ‘krîteranê Ocalanî’ girewtî. Qeraranê giranan ra heta şenikan her qerar de verê bi hewayêkê sîstematîkî ewnîyenê tira rewşa Ocalanî ser o tesîr kenê ya nê.”
Avûkat Erolî vist vîrî ke Rayberê Şarê Kurdî Abdullah Ocalan û embazê ci binê tecrîdê giranî de yê û vat: ”Tewr peynî de aşma adare ya 2020 de keyeyî pêvînayîşêk kerd. Di serrî û nêm o ke Zîndanê Îmraliyî ra xebere nîna girewtene. Yew serrî yo vengê înan zî nîno ma. No tecrîdo giran çîyo xeyr nîyo. Seba ke Birêz Ocalan û embazê ci xover danê tecrîd wina yeno girankerdene. Zîyaretê CPTyî yê Îmraliyî zî tim problemin ê. Verî tesbîtê raştî kerdêne la nê des serranê peyênan de goreyê rewşe têgêreno. Tewr peynî de aşma ravêrtî de CPTyî Îmrali zîyaret kerd la derheqê zîndanî de Dezgehanê Komelê Sîvîlî de pêvînayîş nêkerd. Coka ma nêzanê pêvînayîş senî ravêrto û çimdarîyê ci senîn ê. Ma heme qewimîyayîşanê Îmraliyî sey raporanê hîrê aşman resnenê CPTyî û wazenê ke wa berpirsîyarîya xo bîyaro ca. CPT ganî berpirsîyarîya xo bîyaro ca û şîrikê tecrîdî mebo.”
Avûkatê Buroyê Huqûqî yê Asrinî Faik Ozgur Erolî vîst vîrî ke het hetê dinya ra huqûqnas û temsîlkaranê Rêxistinanê Komelê Sîvîlî semedê şîyayîşê Îmraliyî muracat kerd o û vat: “Hem Tirkîya û hem zî Ewropa, Amerîka û Rojhelatê Mîyanênî de xeylêk huqûqnasan muracat kerd ke no çîyêko zaf muhîm o. Pê nê paştdayîşî bêhuqûqîya Îmraliyî dinya de dahîna zelal ameye vînayene. Sîstemê tecrîdî sey standartî rejîmê xo yê sîstematîkî yê red û înkarî domneno. Nika her ca de vera nê sîstemî têkoşînêk est o ke tim girdêr beno.” ANQARA
