Armîta Girawend (16)a ke şaristanê Kirmaşanî yê Rojhelatê Kurdîstanî ra ya netîceya îşkenceyê polîsanê exlaqî yê dewleta Îranî de amebî qetilkerdene.
Keyeyê Armîta waşt ke cenaza Kirmaşan de defin bikera la dewleta Îranî no nêverda. Cenaza roja yewşemeyî Goristanê Tehranî de bi merasîmêkê girseyî ameye definkerdene.
Cenaza de xeylêk kesî ameyî destbendkerdene. Dîya zanayene ke merasîmê cenazaya Armîta Girawend de avûkata aye û aktîvîsta heqanê merdiman Nesrîne Sotudeh ameya destbendkerdene.
Mêrdeyê Nesrîn Reza Handanîye eşkerayîye daye AFPyî û vat: ”Cinîya mi merasîmê cenazaya Armîta Girawend de ameye destbendkerdene.” Handanî pare kerd ke wextê destbendkerdişî de Nesrîne Sotudeh ameya derbkerdene.
Nesrîne Sotudeh (60) 2012 de layîqa xelata Sakharovî amebî dîyene û xeylêk caran amebî tepiştene.
