Avûkatanê Ocalanî semedê pêvînayîşê muwekîlê xo muracatê Serdozgerîya Komare ya Bûrsa kerd
Avûkatê Rayberê PKKyî Abdullah Ocalanî yê ke 2ê gulane de muwekîlê xo reyde pêvînayîş kerdo, seba pêvînayîşî muracatêko newe kerdî. Avûkatî Newroz Uysal, Mazlum Dînç, Faîk Ozgur Erol û Cengîz Yureklî bi nê amancî muracat bi Serdozgerîya Komare ya Bûrsa kerd.
27ê Temmuze ya 2011î ra heta nika 180 muracatê avûkatan bi behaneyanê cîya cîyayan ameyî redkerdene. Muracatê avûkatan ê 27ê temmuze 2011 ra heta nika bi behaneyanê sey ‘muxalefetê hewayî‘, ‘xirabîyayîşê kosterî‘, ‘koster tamîr de ya‘, ‘OHAL‘ û tewr peynî zî ‘qanûnê bi Hûmara 5275î yê Derheqê Înfazê Tedbîranê Ceza û Asayîşî‘ ameyî redkerdene.
Netîceyê xoverdayîşê grevê vêşanîye ke bi serkêşîya Hemsereka KCDyî û Parlementera HDPyî ya Colemêrgî Leyla Guvene de aver şî, avûkatan ra Nevroz Uysal û Rezan Sarica badê 8 serran reya yewin 2ê gulane de Ocalanî reyde pêvînayîş viraştî. Avûkatanê Ocalanî rê dimayê 8 serran 2ê gulane de destûr ame dayene ke muwekîlê xo reyde pêvînayîş bikerê. Avûkatan tewr peynî 22ê gulane de reyna Ocalanî reyde pêvînayîş viraştî.
Mehkemaya Cezaya Giran ya Bûrsa 17ê nîsane de qerarê wedarnayîşê qedexeyê Ocalanî ser wedarnaye. Wezîrê Edaletî Abdulhamît Gulî zî 16ê gulane de eşkerayî dabî û vatbî ‘Qerarê astengkerdişê avûkatanê Ocalanî ser ameyo wedarnayene.’ STENBOL
