Avûkatanê Komeleya Huqûqnasan a Seba Azadîye (OHD) derheqê tecrîdê vera Rayberê Şarê Kurdî Abdullah Ocalanî, Veysî Aktaş, Hamîlî Yildirim û Omer Hayrî Konarî de verê Edlîyeya Amedî de eşkerayîyêke daye. Xeylêk avûkatî pê cubeyanê xo tewrê eşkerayîye bîyî.
Endamê OHDyî Muhîttîn Muguçî da zanayene ke 25ê adara 2021î ra nata Ocalanî ra xeberêke nêna girewtene û Ocalan Zîndanê Îmraliyî de ke tede rejîmêko taybet esto tepişîyeno. Tecrîdî krîzê Tirkîra hîna kerdî giranêr. Nêno qebulkerdene ke tepişteyî heqê xo yê bingeyî ra bêpar bimanê û sûc o ke 11 mengî yo tepişteyanê Îmraliyî ra xebere nêna girewtene.
Birêz Ocalan nasnameyê xo yê polîtîkî ra tepişte û hukmwerdeyanê bînan ê Tirkîya ra cîya maruzê nêzdîbîyayîşêkî maneno ke no nêzdîbîyayîş goreyê peymanan û qanûnanê heqanê merdiman nîyo. Prosesê Îmraliyî serra 1999î ra nata verê çimanê her kesî de yeno kerdene. Kerdişê Îmraliyî bîyê referansê bingeyî yê vera haştîya komelkî û çinkerdişê heq û azadîyan. Temasê bi Ocalanî seba qedîyayîşê krîzanê komelkîyan gamêk a. Ma venga selahîyetdaran danê ke goreyê krîteranê huqûqî têbigêrê û mesuldarîyanê xo yê bingeyînan bîyarê ca. Tecrîdê Îmraliyî cade wedarnê.” AMED
