Rayberê Şarê Kurdî Abdullah Ocalano ke 24 serrî yo binê tecrîdê giranî de yo û di serrî yo tira xebere nîna girewtene. Badê erdlerzê 6ê sibate murcatê avûkatan û keyeyanê Abdullah Ocalan û tepişteyê bînê ke Îmrali de yê Omer Hayrî Konar, Hamîlî Yildirm û Veyşî Aktaşî reyna nêameyî qebulkerdene û pêvînayîşî hema zî yenê astengkerdene.
Goreyê xebera Ajansê Mezopotamya avûkatanê Boruyê Huqûqî yê Asrinî 16ê adare de madeyê 20, 40 û 17 ê Qanûnê Bingeyî nîşan dayî ke ”cuyeya taybete û cuya keyeyî rê hurmet”, ”heqê heq û hurîyetî” û ‘2îxlalê îşkence û ezîyetî” biserûber kenê û seba ke nê heqî yenê binpaykerdene muracatê Mehkemeya Qanûnê Bingeyî kerd.
Muracatî de bale ameye antene astengkerdişê zîyaretê keye û avûkatan ser ke bi hewayêkê sîstematîkî bêmabên dewam kenê.
Avûkatan vat bi nê astegkerdişan heqê muvekîlanê înan rê yeno mudaxalekerdene û nê vatî: ”Rixmê rewşa afata xozayîye zî pêvînayîş nêmae kerdene. Goreyê qanûnî wextê winayênî de heqê tepişteyan est o merdiman û avûkatanê xo reyde pêvînayîş bikerê û heqê telefonî bişuxulnê. La muvekîlê ma nê heqê xora mehrum ameyî verdayene.
Eke netîceya felaketa xozayîye zî bêrê destgirewtene, astengkerdişê pêvînayîşî meşrûyetê xo vînî keno. No binpaykerdişê qedexeyê mudaxaleyê xirabî yo. Qedexeyê îşkence û mudaxaleyê xirabî têna fîzîkî nîyo, eynî wextî semedê dejanê ke hetê ruhî ra yenê antene zî vîyartbar o.
Goreyê hûmara fermî 48 hezar kesî erdlerz de merdî û merdimê muvekîlanê ma zî nê bajaran de manenê. Rixmê na felaketa girde muvekîlê ma nêeşkenê merdimanê xo ra xebere bîgêrê. Muwekîlanê ma cara bêxebere verdenê ke wa bitersê û dejê manavî biancê. Xora hetê bînî ra merdimê muvekîlanê me bi serran o seba ke xebere nêgenê dej ancenê.”
