Avûkatanê Rayberê Şarê Kurdî Abdullah Ocalanî 1999î ra nata 2 hezar û 30 rey semedê pêvînayîşî muracat kerd, têna 366 rey pêvînayîş ame kerdene. Avûkatanê Buroyê Huqûqî yê Asrinî ra Îbrahîm Bîlmez ard ziwan ke bêhuqûqîye ra wetêr hinî zordarîye yena kerdene.
Bilmezî vist vîrî ke badê pêvînayîşê telefonî yê nimcetî yê adara 2021î ra nata înan qet Abdullah Ocalanî ra xebere nêgirewta û nê vatî: ”Hinî bêhuqûqîye û tewirê keyfî ra wetêr zordarîye qewimîyena. Seba ke pêvînayîşê keyeyî mero kerdene cezayanê dîsîplînî danê, seba ke avûkatî pêvînayîş mekerê qeraranê dadgerîya înfazî ramojnenê. Îmrali de se beno hayîya ma pê çîn a. Qerarê ke derheqê muwekîlanê ma de yenê dayene ma înan zî nêvînenê. Qey cezaya dîsîplînî yena dayene ma nêzanê. Mehkeme ê qereran zî ma ra nimnena. Nêwazenê ke wa Îmraliyî ra xebere bêro girewtene.
Tecrîd yeno manaya çaresernêkerdişê meseleya kurdan. Na mesele tewr peynî de do bêro çareserkerdene la çîyo muhîm oyo ke hema fatûra girdêr nêbîya wa bêro çareserkerdene. Birêz Ocalan semedê şaranê Tirkîya yew şens o û ganî no şens bêro şuxulnayene. Coka ganî tecrîd bêro wedaritene. Xora mercîyê huqûqî bewlî yê. Ma muracatê pêrune kenê. Ma do hema dewayanê neweyan abikerê. Reyna ma do dezgehanê eleqedaran ê Ewropa de falîyetanê xo bidomnê. Tirkîya û warê mîyanneteweyî de paştdayîşê vera tecrîdî zêdîyeno. Eke wina dewam bikero û ez pê bawer a ke do no tecrîd bêro şiknayene.”
Îbrahîm Bîlmezî kronojîya muracatanê pêvînayîşanê avûkatan zî pare kerd. Goreyê doneyanê Buroyê Huqûqî yê Asrinî 1999î ra nata 2 hezar û 30 rey semedê pêvînayîşî muracat ame kerdene û têna 366 rey pêvînayîş ame kerdene. Hezar û 664 muracatan ra tay bi sebebanê cîya cîyayan û tay zî bîlasebeb ameyî redkerdene.
