Qezaya Meramî ya Konya de keyeyê Dedeogullari ke Qers ra bî, 12ê Gulane de rastê hêrîşê keyeyê Keleç û Çalik amebî. 30ê Temmuze de merdimê keyeyê Keleşî, Mehmet Altun keyeyî qetil kerdibi. Îdianameyê amebi amadekerdiş de pêşkêşê dadgehe ame kerdiş.
Derheqê hêrişê 12ê Gulane de îdianame pêşkêşê 8in Dadgeha Cezaya Giran ya Konya ame kerdiş. Îdianameyê derheqê qirkerdişê 30ê Temmuze de şawitî 4in Dadgeha Cezaya Giran ya Konyayî. Yeno pawitiş ke 15 rojan de îdianame bêro qebûlkerdiş yan zî semedê kêmî bêrê çareserkerdiş teslîmê dozgerî bêro kerdiş.
‘Vernîya ma de çapemenî rê serwîs kerdî’
Avûkat Abdurrahman Karabulut derheqê di îdianameyan de qisey kerd û vat: “Ma têkilîyê lêşin ê hukm û çapemenî ferq kerd. Roja dimayê qirkerdişî ma bi meslegdaranê xo dir bi serdozgerî dir kombîyayîşêk kerd. Ma waşt ke qeydê kamera bidê ma û tu qerarê nimitişî serê dosya de çinbi. Dozgerî vat, nika yeno cigêrayîş û roja dişime peyser bêro dayîş. La dimayê ke ma şî cenaze, qeydê kamerayî deqeyêk û nîm A Haber de vejîya. Ma zî ferq kerd ke çapemenî û hukm mîyanê têkiliyêk lêşin de yê. Çapemenî rê serwîskerdiş rewşêke sûc teşkîl kerdêne bi. Avûkatê dosya ke nêeşkenê xo biresnê îdianame, la çapemenî de yeno serwîskerdiş. No nîno qebûlkerdiş. Ma pey dewa vera nêdanê.”
‘Cigêrayîşêk bi tesîr çin o, goreyê ma îdianame qels o’
Abdurrahman derheqê îdianame de wina vat: “Dadgehe hema nê qebûl nêkerdo, ercnena. Ez bi serekê 4in Dadgeha Cezaya Giran ya Konyayî dir qisey kerd. Vat, mîyanê hewteyî de ercnayîşê xo bikerê. Îdianameyî de kêmîyê cidî estê. Ma waşt bi nuşteyî neql bikerê. Ma vat, yê ke ameyê tehlîyekerdiş, wa bêrê tepiştiş. Tetîkêş 3 mengî vernîya serebûtî de wesayîtêk bi 25 hezarî kîra kerdo. Bi nê wesayîtî dir şîyo Bursa, Anqara, Eskîşehîr û Stenbol. Gelo uca de kamî dîyo, kam ci otelan de mendo? Derheqê nê de cigêrayîşêk çin o. Goreyê ma îdianameyî de delîlê somutî ca nêgirewtê. Serê komê Whatsabî de mesajî estê. Nê delîlê tewr girîng bî. La nêkerdê mîyanê îdianame. Delîlê zaf şenikî kerdê. Bi nê delîlan zî vatê nînan tehliye bikerê. Ma îdianame cidî nêgînê. Kêmî xeylêk zêde yê. Gelo pey nê kesan de kam esto? Goreyê ma cigêrayîşêk bi tesîr nêameyo kerdiş.
‘Derheqê kredî de cigêrayîşêk çin o, pey gumanbarî de hêzê cîya estê’
Abdurrahmanî dewam de wina vat: ” Gumanbar vano ez nêxebitêna la kredî anceno. Zanayîşêk derheqê kredî de çin o. Tu banka semedê kesêk meaş nêgîro, bêkefîl kredî nêdana. Ganî no bêro cigêrayîş. Semedê nê zî ma do waştişê xo bîyarê ziwan.”
‘Cigêrayîş baş nêameyo kerdiş’
Abdurrahmanî serê kêmîyê cigêrayîşî de vindert û vat: “Ma derheqê Alî Keleşî yê serê watsapî de koma bi nameyê ‘dadgeh’ awan kerda û derheqê keyeyê Dedeogullari de qisey kerd û waştişê tepiştişî kerd. Waştişê ma hetê Dadgeha Cezaya Sulhî ra ameye redkerdiş. Ma do coka muracatê dadgeha corî bikerê. Îdianameyê de derheqê pî, dayîk û cinîya gumanbarî de bi pêroyî 11 kesî de qerarê bêtaqîbkerdişî ame dayîş. Ma seba nê muracatê Dadgeriya Cezaya Sulhî kerd. Derheqê hêrişê 12ê Gulane ya hemverê keyeyê Dedeogullari de, îdianameyêk ame amadekerdiş. Îfadeyê ke 7 muvekîlê mi ra 5 heban dayê de, hêriş bi hîsê nîjadperestî ameyo kerdiş. Nê îfadey zabitnameyan de zî estê. Hêrişkeran vato ke, ‘Ma ulkucî yê, şima tîya de wedarnenê’ û hêriş kerdê. La amancê înan oyo ke serê nê padê. La derheqê serebûtî de hemû delîl û belgeyê ke kewtî destê ma, ma bi rayaumumî dir pare kerd. Ma do muracatê sucî bikerê.”
‘Muvekîlê mi vatî, hêriş de 50-60 kesî estbî’
Abdurrahmanî vat, hêrişê 12ê Gulane de 50-60 kesî bîyê û vat: “A şewe veng dayê kamî, kam ameyo uca, derheqê nê de xebatêke nêameya kerdiş. Hêrişê 12ê Gulane de derheqê 6 kesî de ‘teşebusê kiştiş’ û ‘tehdîd’ de îdianame ameyo amadekerdiş. Bêguman sûcê ‘binpaykerdiş destnêdayîşê awanî’, ‘tehdîd’ esto. Prosesê muhakemeyî de ma do pawitiş no het ra bikerê. Komêke ma 30 kesî ke yê pawitişî yê avûkatan ra yena meydan esta. Heme kesê ke hemverê nîjadperestîyê ganî vera nê de vinderê.” ANQARA
