Ame dîyarkerdene ke Ayaz û Nupeldaye yê way û birayê yewbînan ke netîceyê teqayîşê muhîmatêko eskerî de cuya xo vindî kerdbî, raşteyê yewîya nimite yê eskerî de cuya xo vindî kerdî
15 temmuze de mezraya Çakliyayla ya pabesteyê dewa Bîlgeçî ya qezaya Pulurî ya Dêrsimî de teqayîşêk vejîyabî û domanê way û birayê yewbînan Ayaz (8) û Nupelda (4) Gulogluye cuya xo vindî kerdbî. Walîtiya Dêrsimî hedîse ra dima eşkerayî dabî û vatbî ke teqemenîyoke bi destan ameyo viraştene vera domanî cuya xo vindî kerdî. Yeno vatene ke domanî bi teqemenîyo ke bi destan ameyo viraştene nê, bi muhîmatê eskerî cuya xo vindî kerdî.
Eşkerayîya Walîyê Dêrsimî Tuncay Sonerî bibî sebebê reaksîyonê keye û şarê Dêrsimî. Keyeyê Guloglu no 3 serrî yo şono wareyan û aşmanê hamnanî wareyan de derbaz keno. Keyeyê Guloglu derheqê hedîse de nêwazeno çapemenî rê qisey bikero.
Teqayîş 15 metre dûrê çadirê keye de pê ame. Şopê teqayîşî persan sereyê merdiman de virazenî. Teqayîş qet çal ya zî kotran nêviraşto. Cok ra wina aseno ke teqayîş bi teqemenîyo ke bi destan ameyo viraştene ra nêbîyo. Teqayîş nizdîyê Qereqolê Kuşluca de pê ame û şikî zêdîyenî.
Serekê Baroya Dêrsimî Kenan Çetîn dîyar kerdke herêma de teqayîş tede bîyo mîyanê sînoranê qedexekerdeyan de nîya. DÊRSIM
