Wekîlê HDPyî yê Çewlîgî Erdal Aydemîrî ke Heyetê Pêroyî yê Meclîsî de qisey kerd û veng da ke wa Çewlîgo ke binê rîskê erdlerzî de yo, cade bibo herêma afate.
Erdal Aydemîrî vat: ”Ez wazena bi nameyê şarê Çewlîgî tîya ra hukmatî ra wina bipersê: Hela ke qala erdlerzî bena, verî kam bajar yeno vîrî? verî Çewlîg yeno vîrê merdiman. Vîst rojî yo pêro Çewlîg bîyo yew û seba ke bajar sey herêma afate bêro îlankerdene veng dano. Ez zî wazenê tîya ra veng bikerê wekîlanê îqtîdarî yê Çewlîgî Cevdet Yilmaz û Feyzî Berdibek û Serekkomar Erdoganî wa Çewlîg cade bibo herêma afate. Seke yeno zanayene wird xetê fayî yê erdlerzî bajarê ma de yenê têhet û erdlerz yeno pawitene.”
Gerek tedbîrî bêrê girewtene
Aydemîrî qiseykerdişê xo yê peyênan de vat: “Ez wazena tîya ra nê bipersê: Çewlîg de kam xebata erdlerzî ameya kerdene? Ma tîya ra persenê: Eke erdlerz bibo depoyêkê Mudirîya Afate ya Bajarî û Serekîya Şarederîye est o? Depo de stokê xeyman est o, werd, zexîre, awa werdî est a? Malzemeyê xelisnayîşî est o? Eke est o, hûmara ci çenda? Ma nêwazenê wa reyna dejê erdlerzê 1ê gulan a 2003î biqewimîyo. Çewlîg de erdlerz yeno pawitene, gerek cade sey herêma afate bêro îlankerdene û tedbîrî bêrê girewtene.”
